OKC mipakaging sa Grizzlies

CEBU, Philippines — Gisubhan og kadaogan ang Golden State Warrior sa ilang unang duwa sa bag-ohay palang nagsugod nga Western Conference First Round NBA Playoffs batok sa Houston Rockets, 95-85 kagahapon, Abril 21,2025 adlaw nga Lunes (oras dinhi sa Pilipinas).

Mipusa og 31 ka puntos ang pambato sa Warriors nga si Stephen Curry  sa maong duwa.

Ang Rockets uwahi nang nikamas sa naghinapos nga duha ka kwarter apan wala gihapon makagukod sa Warriors bisan og sa pagsugod wala kaayo namuntos si Curry.

Nikonektar si Curry  og 12-sa -19 ka itsa niini  apil ang lima ka 3-pointers. Samtang si Jimmy Butler nitampo sab og 25 puntos, pito ka rebounds, unom ka assists ug lima ka steals aron masungkit ang pinakauna nilang daog karon nga playoffs, kortesiya sa Rockets.

Samtang daw giibtan og mga kuko sa  top-seeded Oklahoma City Thunder ang Memphis Grizzlies human nila kini gilubong og taga liog nga 51 puntos, 131-80 sa ilang duwa.

Ang 51 puntos nga pagkalubong mao pay labing una sa kasaysayan sa Game 1 sa NBA playoff  ug kini motatak na sa pangalan sa Grizzlies.

Kini bisan pa man ang sinaligan sa Thunder nga si Shai Gilgeous-Alexander nangamote pagpamuntos nga nakahipos lang og 15 puntos, lima ka assists ug tulo ka rebounds.

Mas namuntos pa kaysa niya silang Jalen Williams, 20 points ug unom ka assists ug ang top scorer si Aaron Wiggins sa iyang 21 puntos.

Hinuon kumparar sa Grizzlies nga nakasulod lang sa playoffs via play-in tournament, ang OKC taas ang panahon nga nakapahuway ug nakapraktis kay sayo silang nakasulod gumikan sa ilang maayong labok sa regular season.

"We had a lot of guys that played a lot of minutes play the rest of the season, so that was big for them. And then I think we just did a good job of pacing out practice and having time like that off and making that the best of our ability," matud pang Williams.

"I think we're well rested. Our legs are fresh and we just did a good job of taking that off time," dugang pa niya. Ang Game 2 sa series himuong karong adlawa Martes (Miyerkules sa Pilipinas).

Sa laing mga duwa, ang  reigning champions Boston Celtics ug ang Cleveland Cavaliers nipupo sab sa ilang unang mga kadaugan.

Ang Celtics nga giaswat ni Derrick White milampaso sa Orlando Magic, 103-86. Si White nakahipos og 30 puntos para sa iyang koponan.

Samtang ang Cavaliers, kinsa mipildi sa Celtics sa Eastern Conference, mikulata sab sa Miami Heat, 121-100.

Ang sinaligan sa Boston nga si Jayson Tatum miiskor lang og 17 puntos human sa makalilisang niyang pagkatagak gikan ni-dunk sa dihang gipuntariya siya ni Kentavious Caldwell-Pope sa fourth quarter nga nakaingon sa pagpanakit sa iyang tuong pulso. Si Pope gitawgan og flagrant foul tungod niini.

Bisan sa iyang gipamati nakahimo gihapon og 3-pointer si Tatum, apan si White maoy miaswat sa Boston sa ihyang pito ka 3-puntos.

Si Jaylen Brown, kinsa bag-o pang nabalik og duwa gikan sa injury sa tuhod nakaiskor og 16 puntos samtang si Payton Pritchard nipuno sab og 19 para sa Boston.

Sa laing bahin, si Paolo Banchero miiskor og 36 puntos, 11 rebounds para sa Magic. Samtang si Franz Wagner nipuno sab og 23 puntos, silang duha lang ang naka- double figures sa para sa ilang koponan anang duwaa.

Samtang sa Cleveland, miiskor si Donovan Mitchell og 30 puntos ug si Ty Jerome nitampo sab og   16 sa 28 fourth quarter aron buboan og bugnaw nga tubig ang nagsigang Miami Heat.

Sa second quarter palang, gilubong na og 16 puntos ang Miami, apan sa hinayhinay nila kining natimbahangan sa pagdagan sa duwa hangtud sa fourth quarter, apan wala mura nalang og aso wala nay kalayo ikabuga sa dihang si Jerome nanginit ug mipabuto og unom ka itsa diin unom niini nasulod aron makalingkawas ang Cleveland.

"The thing that makes us special — it can be anybody any night," matud pang Mitchell.