Press Freedom Week 2012

Opisyal na nga sugdan karong adlawa ang Press Freedom Week 2012 nga gisaulog matag tuig agi'g paghandom sa deklarasyon sa Martial Law nga nahitabo niadtong Septiyembre 21, 1972.

Buksan kini pinaagi sa parada sa mga nagkadaiyang media outlets sa Sugbu ug manukad kini sa Ayala Business Park luyo sa Cebu City Police Office (CCPO) paingon ngadto sa SM City-Cebu.

Daghang mga kalihukan nga mahitabo sud sa usa ka semana nga pagsaulog gikan sa mga forums, seminars, trainings ug sports activities. Kagabii gihimo usab ang pagpili sa Miss Press Freedom 2012.

* * *

Dili na man tuod kaayo alang sa uban nga kaparehas ka-exciting ang ikaupat nga sangka nilang Manny Pacquiao ug Juan Manuel Marquez itandi sa niagi nilang trilogy, apan tuguti ako ninyong isipon kining exciting gihapon.

Seguro mao na kini ang posibleng katapusang sangka ni Pacquiao kun dili gyud makig-atubang kaniya si Floyd Mayweather Jr. Tungod niini, si Pacquiao kinahanglang mohimo og impresibo nga daog batok kang Marquez kay sa nangaging tulo nila ka mga away daghan gihapon ang may mga pagduda.

Si Pacquiao wala gyud maka-knockout ni Marquez, tinuod napatumba siya, apan dili gyud hingpit nga knockout. Sa tanang nakaatbang ni Pacquiao, si Marquez ray maoy labing maayo isip usa ka counterpuncher.

Si Marquez bisan pa man makaduha na mapilde (sa rematch ug sa ikatulo) ni Pacquiao, nagtuo gihapon nga siya maoy midaog. Gani bisan sa una nilang sangka nagtuo siyang gitikasan siya sa desisyon maong miresulta sa "draw."

Sa ikaupat nga bangga unya sa duha, timan-i mga Tirador nga kulbahinam kini kay ang duha pulos buot magbilin og legasiya sa kasaysayan nilang duha. Kun si kinsay mas maayong laki.

Gituldokan na man unta kini sa katapusan nilang away, apan seguro mas halinon ang Pacquiao-Marquez fight itandi sa rematch ni Pacquiao ug Timothy Bradley maong nagkauyon ang duha ka kampo.

* * *

Gamay ra kaayo ang nasayod niini, gawas sa atong sikat nga Pinoy Azkals sa football. Aduna usab kita'y mga babayeng Malditas nga sama sa Azkals nagrepresentar gihapon sa atong Bandila didto sa ubang nasud.

* * *

PAGTULON-AN: Ayaw paabotang mahulog ang bunga aron makakaon.

Email: [email protected]