1st Fit-Fil Camp gitakda dinhi sa Sugbu

CEBU, Philippines - Ang mga health enthusiasts makasuway og lahi ug epektibong matang sa ehersisyo sa ipahigayong 1st Fit-Fil Camp nga gitakda sa Mayo 15 hangtod sa Hunyo 9 diha sa The Terraces sa Ayala Center-Cebu.

Gawas sa Sugbu, adunay simultaneous launching sa maong fitness camp didto sa Bonifacio Global City didto sa kaulohan.

Pinangulohan sa sikat nga fitness instructor sa nasud nga si Jim Saret, laraw sa maong fitness camp nga mopalambo pa sa paagi alang sa himsog nga panglawas sa mga Pinoy.

"It’s an advocacy campaign, gusto ko sana ang Pilipinas maging malakas na bansa," matud pa ni Saret atol sa press conference kagahapon didto sa Big Mao sa Ayala Center-Cebu. "Di ka lang magpapayat, strong ka pa."

Si Saret, usa sa sports training consultant sa Smart Gilas maoy mangunay sa fitness camp nga gihulagway nga lahi sa uban tungod kay magbasi kini sa "scientific" nga aspeto sa ehersisyo.

Uban ni Saret mao ang iyang kapikas ug US cross-fit certified trainer nga si Toni ug kanhi "Biggest Loser" Pinoy edition contestant nga si Alan Choachuy, kinsa bag-o lang misalmot sa XTERRA triathlon series didto sa Liloan.

Alang sa dugang mga pangutana kabahin sa Fit-Fil Camp, mahimong mo-email sa [email protected].  (BANAT SPORTS)