SCSIT mipahamta'g unang pilde sa Ave Maria sa CBA caging

CEBU, Philippines - Nakabangon dayon ang Salazar Colleges of Science and Institute of Technology (SCSIT) Skyblazers human masugamak   dihang ilang gipahamtangan ang Ave Maria Sanctuary Park sa labing una nilang pilde, 111-107 sa 2nd Cebu Basketball Association-M. Lhuillier Kwarta Padala Mayor’s Cup kagahapon didto sa Cebu Coliseum.

Human mapilde ngadto sa    Asian College of Technology (ACT) Cyber Knights, 87-104 niadtong Miyerkules, ang Skyblazers nakarekober pinaagi sa pagpaluhod sa Ave Maria aron saw-an ang unang dapit sa liderato sa managsama nilang 3-1 win-loss records.

Sama sa gihapon, ang SCSIT ni coach Jojo Romarate misandig ngadto sa ilang forward nga si Mark Abadia, kinsa maoy mihatag kanila sa singko puntos nga labaw, 85-80 human sa third period.

Wala hinuon magpa-alkanse ang Ave Maria dihang miarangkada si Jercules Tangkay kinsa mipabuhagay og 10 puntos aron tablahon ang iskor, 94-all, sa nahabiling 5:27 sa duwa.

Padayon nagsinukliay og puntos ang duha ka koponan nga miresulta sa laing panagtabla, 106-all sa katapusang 52.6 segundos sa duwa, apan ang put-back ni Elvis Labares maoy mihatag sa dos puntos nga labaw sa SCSIT, 108-106.

Si Tangkay mipasud og usa sa iyang duha ka free-throw aron pingsan ang labaw, 107-108, apan subling mibida si Labares, kinsa mipatusak sa iyang crucial jumper alang sa 110-107 nga labaw sa katapusang 10 segundos.

Si Abadia maoy topscorer sa SCSIT pinaagi sa iyang 27 puntos, samtang si Labares miamot og 21 puntos ug si Dale Singson mitampo og 14 puntos.

Ang pilderong Ave Maria gipangulohan ni Tangkay, kinsa miposa sab og 27 puntos, gisundan ni Danny Aying nga adunay 20 puntos, si Ian Saladaga miabuno og 17 puntos.

PUNTOS MATAG USA

SCSIT (111) - Abadia 27, Labares 21, Singson 14, Caputolan 12, Berami 10, Torion 9, Galinato 8, Saguindel 2, Omolon 2

Ave Maria (109) - Tangkay 27, Aying 20, Saladaga 17, Cortes 10, Cainglet 10, Cantonao 9, Esperat 6, Defino 4, Amores 2, De la Pisa 2  (BANAT SPORTS)