Ave Maria, 2-0 na sa CBA

CEBU, Philippines - Sa makausa pa, ang Ave Maria Sanctuary Park naghangad sa ilang mga beterano paglubong sa Asian College of Technology (ACT) Cyber Knights, 92-79 sa secondary match sa 2nd Cebu Basketball Association-M. Lhuillier Kwarta Padala Mayor's Cup basketball tournament kagahapon didto sa Cebu Coliseum.

Sila si Danny Aying, Jercules Tangkay ug Alex Cainglet maoy nanginit sa opensa sa Ave Maria, kinsa mikulit sa ikaduha nilang sunod-sunod nga daog human usab sila midaog   sa Three-Sixty Pharmacy-Online Training Camp, 93-89 atol sa opening day niadtong Domingo.

Si Aying miposa og 18 puntos, samtang sila si Tangkay ug Cainglet mihabwa og 17 puntos matag usa alang sa Ave Maria nga maoy nikontrolar sa duwa gikan sa pagsugod aron moposte og 12 puntos nga bentaha sa halftime,   51-39.

Mibawos ang Cyber Knights sa ikatulong kuwarter luyo sa mga paningkamot nilang Eliud Poligrates ug Mark Magsumbol aron pahakan ang labaw ngadto sa siyete puntos, 62-69.

Apan didto ra kutob ang ilang mga paningkamot kay sila si Tangkay, Cainglet ug Kurt Amores mipatuasik sab sa ilang mga baskets aron mahingpit ang kadaugan sa Ave Maria.

Ang Cyber Knights nga nakahiagum sa ikaduha nilang pilde, gipangulohan ni Poligrates pinaagi sa iyang 24 puntos, gisundan nila ni Stephen Padilla ug Magsumbol nga adunay 17 ug 16 puntos matag usa.

PUNTOS MATAG USA

Ave Maria (92) - Aying 18, Cainglet 17, Tangkay 17, Cortes 11, Cantonao 7, Esperat 7, Amores 6, Baribe 2, Dela Pisa 2, Baribe 2

ACT (79) - Poligrates 24, Padilla 17, Lao 16, Magsumbol 11, Bucao 5, Villaver 4, Ursal 2  (BANAT SPORTS)