DBTC lubong sa UV Bantams

CEBU, Philippines - Giayo-ayug lampurnas sa University of the Visayas (UV) Baby Lancers ang ilang kaatbang Don Bosco Technology Center (DBTC) Junior Greywolves sa iskor, 79-54 kaniadtong Sabado aron taposon ang first round of elimination isip second placer overall sa secondary division atol sa nagpadayong 11th Cebu Schools Athletic Foundation, Inc. (CESAFI) basketball season didto sa Cebu Coliseum.

Gitapos sa Baby Lancers ang first round sa ilang 7-1 nga baraha luyo sa walay pilde nga Sacred Heart School-Ateneo de Cebu (SHS-AdC) Magis Eagles kinsa naghupot karon ug 5-0 nga baraha ug adunay nahibiling duha ka duwa—batok sa UC ug sa CEC.

Maikagon karong nagpa-abot ang Baby Lancers kung kinsa tali sa Magis Eagles batok sa reigning champion Cebu Eastern College (CEC) Dragons ang modaug sa ilang showdown ugma diin mahibaw-an kung kinsa gyud ang mahimong number one team human sa first round.

May purohan ang Baby Lancers nga mosakmit sa liderato kung makakuha kini’g mas dakong quotient kung adunay mahitabong triple tie tali kanila sa SHS-AdC ug CEC.

Kung kahinumduman, midaug ang Baby Lancers batok sa Dragons, 62-47 atol gyud sa opening day niadtong Agosto 7 apan napilde sila sa Magis Eagles, 73-79 kaniadtong Agosto 31.

Si Lendyl Earl Dale Undaloc mibahug og 16 puntos aron pangulohan ang Baby Lancers kinsa gihulga sa Junior Greywolves pinaagi sa paglusad ug rally sa fourth period aron matibhangan ang dakung labaw ngadto na lang sa 14 puntos, 39-53 ug may igo pang oras aron unta sa paghingpit sa rally.

Sila si Carmel Leix Mellijor ug Stephen Niere maoy nangu sa 2-3 nga Junior Greywolves sa ilang 14 ug 12 puntos, matag usa.

Puntos matag usa:

UV (79)— Undaloc 16, Desiderio 13, Dennison 11, Fernandez 7, Peralta 7, Tudio 6, Aying 5, Lucero 5, Oche 4, Delos Santos 4, Calumpang 2

DBTC (54)— Mellijor 14, Niere 12, Pono 7, Carbon 4, Aying 3, Escaño 3, Castro 3, Canda 2.  - BANAT NEWS