Webmasters miihaw sa Jaguars
CEBU, Philippines - Miagi pa og tungason nga dalan ang defending champion University of Cebu (UC) Webmasters una nila maangkon ang 95-87 nga kadaugan batok sa University of San Jose-Recoletos (USJ-R) Jaguars sa overtime atol sa pagbukas sa 11th season sa Cebu Schools Athletic Foundation, Inc. (CESAFI) basketball event niadtong Domingo sa gabii diha sa Cebu Coliseum.
Nilabaw og kuwatro puntos ang Webmasters sa nahabiling 32 segundos, apan sila si Jose Tabaloc ug James Regalado mihimog sunod-sunod nga baskets aron tablahon ang iskor, 80-all hinungdan sa overtime.
Sa dugang singko minutos, ang Webmasters mihimo og 15-7 kortesiya nilang June Mar Fajardo nga mipaksit og sayes puntos, Francis Luigi Bercede nga mitimbre og singko puntos ug rookie Jan Michael Auditor nga mitimang og kuwatro puntos.
Sa kinatibuk-an si Fajardo mihipos og 31 puntos aron pangulohan ang Webmasters, samtang si Pao miabuno og 16 puntos ug si Auditor miugkat og 14 puntos.
Si Medget dela Rama maoy nangu sa nahagba nga Jaguars sa iyang 20 puntos ug sila si Regalado ug Abulaiz Suliman parehong mihakot og 15 puntos.
Ikaduha na kining higayon sa Jaguars nga napilde atol sa opening match. Sa miaging tuig, napilde sab sila ngadto sa Southwestern University (SWU) Cobras, 59-65. (BANATSPORTS)
- Latest
- Trending
