Dodie Boy Jr. nagpanikad na batok sa Thai boxer

CEBU, Philippines - Kinahanglan nga ipabuhagay ni Dodie Boy Peñalosa Jr. ang tanan niyang kusog aron may purohan nga mamahimong world champion.

Si Peñalosa Jr. motungtong og balik sa ring batok sa Thai boxer Kong Kiatpracha sa main event sa "Laban ng Lahi: Dugong Kampeyon" ugma sa gabii didto sa Mandaue City Cultural and Sports Complex sa Mandaue City.

Anak ni former two-division world titlist Dodie Boy Sr. ug pag-umangkon ni Pinoy boxing icon Gerry Peñalosa, ang batan-ong Peñalosa mosuway pagkulit sa ikaunom niyang sunod-sunod nga daog batok sa beteranong si Kiatpracha.

 "Wala pa ko kakita og idea unsa moaway akong kontra, pero buhaton gyud nako ang tanan dili lang aron molampos ko apil na pud ang makahatag og nindot nga away sa mga boxing fans," matud pa ni Dodie Boy Jr. atol sa final press conference kagahapon didto sa Sports Exchange Bar and Grill.

Gawas nga manalipod sa iyang limpyong rekord, paningkamotan usab ni Dodie Boy Jr. nga mohimo'g impresibong kadaugan aron maapil siya sa undercard sa Manny Pacquiao-Juan Manuel Marquez welterweight title fight karong Nobiyembre 12 didto sa MGM Grand Garden Arena sa Las Vegas, Nevada.

"Kinahanglan makapakita siya (Dodie Jr.) og convincing nga daog ug gikan didto amo nang sabutan sa MP Promotions ang iyang undercard fight didto sa Las Vegas," matud pa sa kanhi boxing champion ug karon promoter nga si Gerry Peñalosa.

Sa supporting bouts sa GerryPens Promotion ug GMA-7 boxing event, ang ex-WBC light flyweight champion nga si Rodel 'Batang Mandaue' Mayol makigbatok ni Jason Rotoni sa Manila.

Samtang si Jimrex Jaca makigsinukliay og kumo ni Philip Jun Demecillo ug ang comebacking nga si Eden Sonsona moharong ni Eman Labanza.  - BANAT NEWS