V.U.Y. Construction kampiyon na sa 40-above
MANILA, Philippines - Ang crucial steal ni Brikmer 'Yokyok' Alesna sa nahabiling 1:56 sa duwa nakatampo sa V.U.Y. Construction Ranudo paghaw-as og 81-78 nga kadaugan batok sa R.A. Essentials Nangka aron paglangkat sa kampiyonato sa 40-above division sa Barangay Cogon Central Ramos Inter-Sitio Basketball Fiesta Cup 2011 niadtong Domingo didto sa Benjamin Solon Memorial Gym, ning siyudad.
Si Alesna mikadlit og 10 puntos, apan si Glenn Birao maoy topscorer sa V.U.Y. Construction nga miduslit og 13 puntos.
Wala sab kapugngi sila si Erwin Ferrer, Lee Limosnero ug John Rivera nga mihirit og 10 puntos matag usa. Nitampo sab og dos puntos ang kanhi Brgy. Capt. nga si Noel Godiz sa maong kadaugan.
Kanhi Cebu Doctors' University (CDU) White Stallion nga si Rocky Bacalso maoy mikumbati og maayo aron pangulohan ang nalumpag nga R.A. Essentials pinaagi sa iyang 22 puntos.
Misuporta sab sila si Edwin Sico, kinsa miamot og 16 puntos, Lemar Alcover nga mitimbre og 14 puntos ug Barnaby Ang nga miariya og 10 puntos, apan nausik lang ang ilang mga paningkamot kay wala kini makapadaog sa R.A. Essentials.
PUNTOS MATAG USA
V.U.Y. CONSTRUCTION- RANUDO (81) - Birao 13, Ferrer 10, Limosnero 10, Alesna 10, Rivera 10, Sanchez 8, Dela Calzada 6, O. Arbol 4, Godiz 2 C. Arbol 2, Rubi 2, Costas 2, Ybañez 2
R.A. ESSENTIALS- NANGKA (78) - Bacalso 22, Sico 16, Alcover 14, Ang 10, Pada 8, Raymond 6, Tangpus 2 - (THE FREEMAN)
- Latest
- Trending
