TNT, NLEX ready na sa semis

MANILA, Philippines — Kapwa pipilitin ng nagdedepensang TNT Tropang 5G at sister team NLEX na maplantsa ang kanilang best-of-seven championship series sa Season 50 PBA Governors’ Cup.

Ito ay matapos walisin ng nagdedepensang Tropang 5G ang Magnolia Hotshots at Road Warriors ang Phoenix Fuel Masters sa kani-kanilang best-of-five quarterfinals series papasok sa semifinals.

Lalabanan ng TNT sa best-of-five semifinals series ang mananalo sa quarterfinal showdown ng mag-utol na Barangay Ginebra at San Miguel.

“Whoever we play in that series is going to be a much more potent offensive team,” sabi ni Tropang 5G coach Chot Reyes sa Gin Kings at Beermen.

Pinadapa ng Ginebra ang San Miguel sa Game One, 104-95, at Game Two, 126-99, sa likod ni import Jordan Murphy.

Target ng Gin Kings na tuluyan nang walisin ang Beermen sa Game Three bukas sa City of Dasmariñas, Cavite para maitakda ang kanilang semis duel ng Tropang 5G.

Kagaya ng TNT, wala ring pipiliin ang NLEX na makakalaban sa semis sa pagitan ng Rain or Shine at Converge na tabla sa 1-1 sa kanilang quarterfinal series.

Paglalabanan ng Elasto Painters at FiberXers ang mahalagang 2-1 lead sa kanilang serye sa Game Three bukas.