Douthit pinayagan na ngFIBA na lumaro

MANILA, Philippines - Isang magandang balita para sa Samahang Basketbol ng Pilipinas (SBP).

Maaari nang maglaro si naturalized player Marcus Douthit sa Smart-Gilas Pilipinas ng SBP matapos payagan ng International Basketball Federation (FI­BA).

Nangangahulugan na puwede nang sumabak ang 2004 NBA draftee ng Los Angeles Lakers sa mga FIBA tournaments, kasama na rito ang kasalukuyang 9th Southeast Asian Basketball Associa­tion (SEABA) Men’s Championship sa Jakarta, Indonesia.

“I’m glad to hear that. Now, I can really focus on helping the team without distractions,” wika ng 6-foot-11 at 31-anyos na si Douthit.

Ang sulat ay nangga­ling kay FIBA Sport and Eligibility Committee chief Ivanka Toteva, ayon kay SBP executive director Re­nauld ‘Sonny’ Barrios.

Sa kanyang liham sa SBP, kinumpirma ni Toteva ang pagiging eligible ni Douthit na maglaro para sa Smart-Gilas.

Ang tubong Syracuse, New York na si Douthit ay hinugot ni Serbian coach Rajko Toroman para maka­tulong sa kampanya ng Na­tionals sa 2012 London Olympics sa pamamagitan ng pagwawagi sa dara­ting na FIBA-Asia Men’s Champion­ship sa Wuhan, China sa Setyembre.