33 ka bata mitapos sa doce pares eskrima

CEBU, Philippines - Bata pa gani kaayo, kining mga grupoha nga misalmot sa tinuig nga Cacoy Doce Pares World Eskrima Federation, maantigo nang mogamit og olisi ug ingon man usab pagsagang kung dunggabon og punyal o hunting knife.

Kabahin sila sa 33 ka nga bata nga migradwar sa usa ka buwan nga eskrima training nga natapos niadtong Sabado, Mayo 28. Ang maong mga bata gitudloan sab og judo karate sa ilang trainor nga si Master John Mac.

Ang 90-anyos nga Supreme Grand Master nga si Ciriaco “Cacoy” Cañete maoy nangunay sa pagpanghatag sa mga certificates didto sa ilang headquarters sa dan C. Padilla, ning dakbayan.

Sa wala pa sila modawat sa mga certificates, may gipahigayon una nga mga sparring ug demonstrations diin gipakita sa mga bata ang ilang nakat-unan atol sa summer training.

Matod pa ni Dennis Cañete nga karon lang tuiga midagsa ang mga batang interesado sa eskrima tungod kay sa miaging mga katuigan, mga batan-on ug ulitawo maoy misalmot.

Sa laing bahin, gipahibalo ni GM Cañete nga andam na niyang ilusad ang iyang ika-unom ka libro karong umaabot Nobiyembre nga nag-ulohan og “Eskrima y Daga (Stick and Dagger) nga adunay 250 ka pahina gawas pa sa kapin usa ka libo nga letrato.

Naglaraw siya nga adto ilusad ang maong libro didto sa Estados Unidos diin iyang gilauman nga kusog kining halinon sama sa hotcake. (GGM)(BANAT NEWS)