Mawin's nag-una gihapon sa MKBC 2011 summer caging

CEBU, Philippines - Daling nakarekober ang Mawin’s Kitchen human sila makatilaw sa labing una nila nga pilde dihang mi-iskor sila’g 95-91 nga kadaugan batok sa Sambag ug ingon man masakmit ang liderato sa MKBC 2011 summer basketball tournament didto sa Vicente Sotto Memorial Gym sa barangay Punta Princesa, ning dakbayan.

Nakalabaw sa makadiyot ang Sambag, apan wala sila makasustenir sa uwahing bahin sa duwa ilabi na dihang milabaw og 12 puntos ang Mawin’s nilang team owners Maia Adriatico ug Sherwin Lequit, 66-54.

Sa nahabiling pipila ka gutlo sa fourth period, mi-antog og 12 sa iyang 16 puntos si Lequit aron pangulohan ang iyang team, samtang sila si Lemuel Pagunatalan, Mat Vallejo ug Reyland Monares parehong midugang og 15 puntos.

Ang Mawin’s padayon nag-una sa liderato nga adunay 8-1 nga baraha.

Si Mark Villagonzalo maoy nangu sa Sambag sa iyang 26 puntos ug si Nikki Ibona midugang og 21 puntos.

Sa laing duwa, midaog sab ang Kamikaze pinaagi sa paglubong sa Respawn, 58-42 ug ang Dewfoam midaog batok sa Emilmich, 69-62.

Si Jessie Pacaña mirehistro og 16 puntos alang sa Kamikaze, samtang mi-iskor sab og 16 puntos si Wewen Ebrada alang sa Respawn.

Nangulo sa Dewfoam mao si Danny Rabadon, kinsa mipabuto og 20 puntos ug ang Emilmich gipangulohan ni Biboy Potencioso pinaagi sa iyang 17 puntos, gisundan ni Richard Lanutan nga adunay 14 puntos.  (BANATSPORTS)