Mawin's mikulit na sab og daog sa MKBC 2011 summer cagefest

CEBU, Philippines - Mikulit sa ilang ikaduhang sunod-sunod nga daog ang Mawin’s Kitchen nilang team owners Maia Adriatico ug Sherwin Lequit human nila gilubong ang Saints, 83-51 sa   MKBC 2011 summer basketball tournament didto sa Vicente Sotto Memorial Gym sa barangay Punta Princesa, ning dakbayan.

Ang Mawin’s Kitchen nga maoy nidominar sa duwa gikan sa pagsugod hangtod nahuman, gipangulohan ni Mat Vallejo, kinsa milansang og 16 puntos, samtang si Lemuel Paguntalan miamot og 13 puntos.

Sa laing duwa, gisalbar ni Tonix Carungay ang AMBL human niya makompleto ang   talagsaong four-point play sa katapusang 14 segundos sa duwa aron pagposte og 78-77 nga kadaugan batok sa Fatima dribblers.

Si Carungay nakakubit og foul gikan sa 3-point arc ug napasud sab niya ang iyang bonus free-throw nga nakahugno sa Fatima, kinsa maoy kanunay nga naglabaw sa unang-tulo ka mga kuwarter.

Si Carungay mi-iskor og 21 puntos, apan si Glen Birao maoy nangu sa kadaugan sa AMBL nga mipabuto og 22 puntos.

Ang Fatima gipangulohan sab ni Jack Echevarria pinaagi sa iyang 24 puntos, samtang sila si Butch Alentiojo ug Boyet Gonzales mitampo og 13 puntos matag usa .

Sa laing bahin, ang Kamikaze ni skipper Dondon Peleño midaog batok sa Scourge sa iskor nga 76-73.

Ang running jumpshot ni Julius Cabilao sa katapusang 4.9 segundos sa duwa maoy nakapalabaw sa Kamikaze sa labing unang higayon, 74-73 ug ang duha ka free throws ni Jessie Pacaña maoy miselyado sa kadaugan.

Si Banjo Bantaya maoy topscorer sa Kamikaze sa iyang 17 puntos, samtang si Bogart Arco nga mihipos og 17 puntos mao sab ang nangu sa pilderong   Scourge. (BANATSPORTS)