BSBA, Gemmary Pawnshop subha'g daog

CEBU, Philippines - Parehong mikubit og daog ang BSBA cagers ug ang Gemmary Pawnshop batok sa tagsa-tagsa nia ka kaatbang sa pagsugod sa 2010 LLBA Rollway Friendly Inter-Club basketball tournament niadtong Lunes sa gabii didto sa Villas Magallanes gym sa Sta. Lucia Property sa dakbayan sa Lapu-Lapu.

Ang BSBA mipahungaw sa ilang kainit sa second half aron buntogon ang Radaza Boys sa iskor nga 81-75, samtang ang Gemmary Pawnshop miremati sa Sunday Club, 81-64.

Nagsinukliay dayon og mga puntos ang duha ka kampo pagsugod sa duwa nga miresulta sa sikit nga iskor paghuman sa first quarter, 23-21 pabor sa Radaza Boys. Apan ang BSBA milusad og 18-10 nga rally sa sunod kuwarter aron ilogon ang labaw, 39-33 ug wala na makarekober pa ang Radaza Boys gikan niadto.

Si Cacay Verzosa mikadlit og 15 puntos aron pangulohan ang BSBA, gisundan ni Ernie Giganto sa iyang 13 puntos, samtang si Pompie Ngujo adunay 10 puntos.

Lima ka players sa Radaza Boys ang mi-iskor og double figures sa pagpangulo ni Valiente pinaagi sa iyang 17 puntos. Sila si Harry Radaza ug Gonzaga miamot og 11 puntos matag usa ug sila si Clyde Malolot ug Baron pareho sab nga mitampo og 10 puntos.

Sa laing bahin, ang Gemmary Pawnshop ni team owner Aude Medina walay kukaluoy nga milubong sa Sunday Club ni team owner Rolly dela Peza sa iskor nga 81-64.

Ang kanhi UC Webmaster nga si Julius Gastador maoy topscorer sa Gemmary Pawnshop nga miburak og 19 puntos, samtang si Orly Amores mi-iskor og 26 puntos, apan nakawang lang ang iyang mga paningkamot kay kulang siya og suporta gikan sa iyang kaubanan. Si Ondo Casquejo mao lang ang ikaduhang player sa Sunday Club nga mirehistro og double figures sa iyang 10 puntos.

Ang maong torneyo gipaluyohan nilang Rolly dela Peza, Brgy. Capt. Lauro Soroño, Lapu-Lapu City  Councilor Harry Radaza, LLBA Commissioner Alan Yu, Dr. Michael Ouano ug sa D'House of Sports ni Billy Nadado.

Puntos Matag Usa

Unang duwa:

BSBA (81) -Verzosa 15, Giganto 13, Ngujo 10, Sidra 9, Dela Rama 9, Casio 6, Aviles 4, Catag-Catag 4, Enriquez 4, Godinez 4

RADAZA BOYS (75) - Valiente 17, Radaza 11, Gonzaga 11, Malolot 10, Baron 10, Bascon 7, Amistad 5, Lapoja 4, Villanil 2

Ikaduhang duwa:

GEMMARY PAWNSHOP (81) - Gastador 19, Yncierto 14, Gilbuena 13, Payawal 12, Salimbangon 8, Gonzaga 8, Medina 7, Banzon 5, Hermo 2

SUNDAY CLUB (64) - Amores 26, Casquejo 10, Inso 6, Geralde 4, Sepe 4, Dignos 2, Brañanola 2, Llenes 2, Palad 2, Almacin 2. – BANAT NEWS