Mga dagkung sporting events sa IPI gipahibaw

CEBU, Philippines - Padayon gihapon ang International Pharmaceuticals Incorporated (IPI) sa ilang mga programa aron mas mapalambo pa ang natad sa paugnat sa kusog dinhi sa Sugbu.

Human sa malampuson nilang 1st 25K Pilipinas International Marathon, ang IPI laraw karon nga mobubo pa'g panahon ug salapi alang sa mas dagkung sporting events karong tuiga ug kini naglakip sa boxing, cycling ug running.

Sa press conference niadtong miaging gabii diha sa Sports Exchange Bar sa Mango Avenue, si IPI advertising manager Tito dela Merced miingon nga naglaray na ang mga sports events nga ilang ilusad sa nanghinapos nga bahin sa tuig.

Usa na niini ang Casino Femme Women Run karong Nobiyembre 30, diin gilauman sa organizers nga modani og 4,000 ka runners.

Matud pa ni Dela Merced nga bisan og gihimo kini alang sa mga kababayen-an, makahimo gihapon ang mga male runners sa pagdagan sa 21K ug 10K open diin ang modaog maoy mo-qualify sa national race karong Disyembre didto sa SM Mall of Asia sa kaulohan.

Ning higayon, ang modumala sa technical committee mao na si Joel Baring sa SAFE.

Gawas sa running, padayon usab ang mga amateur boxing nga gipasiugdahan sa Omega Boxing stable didto sa mga bukirang barangay sa Sugbu ug mga cycling events. – BANAT NEWS