viking haulers misutoy sa fya

CEBU, Philippines - Nakapasulod og kagumkom kaayong three-pointer ang kanhi maidlas nga point guard sa USJR Baby Jaguars nga si Baeng Medalle ug giselyado ni Dodong Cabigas ang kadaogan alang sa Viking Haulers pinaagi sa iyang split charities aron mo-iskor og come-from-behind nga kadaogan sa iskor, 92-89 batok sa CRV quintet kaniadtong Huwebes sa gabii atol sa nagpadayong 2nd F. Llamas Youth Association (FYA) basketball tournament didto sa Vicente Sotto Memorial Gym sa barangay Punta Princesa, ning dakbayan.

Nabiyaan pa ang Viking og usa ka punto sa nagka-upos na nga oras, 88-89 apan miposa og krusyal nga triple si Medalle aron sakmiton ang labaw, 91-89 ug dihang misipyat ang CRV sa ilang tinguha sa pagpugos og overtime, misamot sila kaguba dihang nakapasulod og usa ka free throw si Cabigas diin kinahanglan na silang mo-igo og tres puntos aron ihatod ang duwa sa overtime apan nahimo kining pakyas nga tinguha sa CRV kay naabtan sila paghuni sa buzzer.

Si Medalle kinsa mibahug og tulo ka triples sulod lang sa fourth period, maoy nangu sa opensa sa iyang 24 puntos samtang si Cabigas midugang og 14 puntos.

Tungod sa maong kadaogan, naghupot na karon og 5-1 nga baraha ang Haulers ug misutoy na sa unahan ug lisod nang palagpoton sa ilang unang pwesto diin sila maoy topseed sa semifinals diin armado sila’g twice-to-beat incentive sa umaabot nilang kaatbang.

Si Janus Abellana mihakot og 25 puntos alang sa 3-2 nga CRV samtang sila si Bern Ylanan ug Dondon Cadungog parehong midugang og 12 puntos matag usa.

Sa laing duwa, midaog ang Angelica team batok sa Leo & Rolly sa iskor, 110-96 aron makigtabla sa standing ngadto sa ilang biktima sa parehong 2-4 nga baraha.

Si Ranel Patalita maoy nangu sa Angelica sa iyang 26 puntos ug laing tulo ka kauban pulos sab mibahug og double figures.

Ang Leo & Rolly gipangulohan ni Royce Sonsona kinsa miburak og night-high 32 puntos ug si Bornong Endrina miabuno og 23 puntos sa pilderong team.

Bisan pa sa ilang kapildehan, ang CRV duna lang gihapo’y paglaum nga motapos sa elimination isip second seed luyo sa Haulers sa higayong modaug sila batok sa Kharoz ug sa Simpolang Barbekyuhan sa kataposan nilang duha ka duwa batok sa lig-on sab nga kaatbang.

Ang bugtong team nga naglawig na padulong sa taas nga bakasyon mao ang Heartfelt kinsa nahimutang sa kinaubsan sa ilang 1-3 nga baraha.

Ang torneyo sa FYA gidumala ni tournament director Boogie Atillo ug gipaluyohan ni Punta Princesa barangay councilor Ray Gabriel Salgado. (BANAT)