UV nakaipsot sa UC

CEBU, Philippines - Nagkaguliyang sa makadiyot ang opensa sa nine-time champion University of the Visayas (UV) Green Lancers sa nanghinapos nga bahin sa fourth quarter, apan nakabawi kini aron pagposte og 82-79 nga kadaugan batok sa University of Cebu (UC) Webmasters sa usa ka emosyonal ug pisikal nga duwa nga miresulta sa pagka-eject sa guwardiyang si Eman Calo aron mag-solo sa liderato sa 10th Cebu Schools Athletic Foundation, Inc. (CESAFI) niadtong Domingo sa gabii diha sa Cebu Coliseum.

Sa sayo pa, tungason sab nga dalan ang gisubay sa University of San Jose-Recoletos (USJ-R) Jaguars ug mikulit sa   labing una nilang daog sulod sa lima ka duwa dihang ilang gipilde ang Don Bosco Technology (DBTC) Greywolves, 66-59

Gitawgan og duha ka “unsportsmanlike” fouls si Calo batok kang Robinson Mohammad sa UC hinungdan sa iyang pagka-thrown out sa nahabiling 4:39 sa fourth period human sa iyang eksplosibong duwa diin miposa siya’g tulo ka three-pointers sa second period ug maoy   instrumento dihang ang Lancers milabaw og 19 puntos sa third period, 58-39.

Unang gibagdokan ni Calo sa iyang mahait nga siko ang ubol-ubol ni Mohammad samtang nag-depensa ang naulahi sa oras nga 1:20 sa third period. Nausban kini batok gihapon ni Mohammad dihang mi-dive sa bola ug dayon gidat-ogan ug mikisikisi sa buko-buko sa iyang karibal hinungdan nga gitawgan na sab siya og laing “unsportsmanslike” foul ug na-ejected.

Naglabaw ang Lancers atol sa maong hitabo, apan ang pungtanong kaayong Webmasters mipahungaw sa ilang kainit ug mihinay-hinay og sikit hangtod nga nailog nila ang labaw. 

Si Edward Pao maoy naghatag og balik sa abante ngadto sa UC dihang mitugpo siya’g three-pointer, 72-71 sa katapusang dos minutos. Mitubo pa kini ngadto sa tres puntos, 76-73 pinaagi sa basket ni Junemar Fajardo, apan dali kining nabawi sa Lancers, kinsa nakahimo’g sagunson nga otso puntos pinaagi sa jumper ni Phil Mercader ug unom ka sunod-sunod nga free throws ni Ralf Olivares.

Ang Lancers nagsolo karon sa liderato bitbit ang 5-0 nga baraha, samtang ang ilang biktimang Webmasters midailos sa ikaduha dala ang 4-1 nga baraha.

Sila si Olivares ug Harold Cincoflores mibahog og 20 ug 19 puntos matag usa aron pangulohan ang Lancers, samtang si Calo, kinsa dili makaduwa batok sa Jaguars karong Huwebes, miamot og 15 puntos.

Sila si Fajardo, Pao ug Kelvin Juliane nagkumboya og 51 puntos alang sa Webmasters.

Sa sayo pa, si Jun Lapiz mi-iskor og 15 puntos aron pangulohan ang Jaguars, samtang si Jefford Aldave, kinsa miburak og 24 puntos mao sab ang nangulo sa pilderong Greywolves.