Ave Maria kampiyon sa inayawan hoopla

CEBU, Philippines - Nagkahinay na tungod sa ilang pangedaron, gigamit sa Ave Maria Sanctuary Park ang taas nga kasinatian aron pakuratan ang mas batan-ong kaatbang ug host Inayawan Selection nga gipaluyohan sa Arante Construction pinaagi sa pag-iskor og come-from-behind 102-94 nga kadaugan nga nahukman lang sa kataposang tres minutos sa duwa aron langkaton ang korona sa Inayawan Fiesta Cup basketball tournament kaniadtong Sabado sa gabii didto sa Inayawan Sports Complex.

Sa sayo pa, ang Gemmary Pawnshop-UC Alumni ni coach Rolando Adarna, maoy misakmit sa ikatulong pwesto human sila modaug batok sa URATEX-Miles nga gipangulohan ni Mark Abadia sa iskor, 100-93 nga diriyot mosangpot og sinukmagay sa makadaghang higayon tungod sa gigamit nga pisikal nga depensa sa matag habig.

Unang nanimaho ang kinumo tali nilang Abadia ug Allain Abellanosa sa UC nga maoy nakalangay sa duwa tungod kay nasundan pa kini’g laing initay sa duha ka paresan. Sa kauwahian, nahimong kataw-anan ang duwa ug tungod kay dako na man og labaw ang UC, gituyo og hatag ni Alex Cainglet ang bola ngadto sa kontra kinsa nagpaabot didto sa three-point area ug mipasulod ug duha ka triples ug gihugyawan sa katawhan.

Sa juniors 21 under division, gipukan sa HUBS dribblers ang mas paboritong CHILL quintet nga gipangulohan ni John Michael Tallo sa iskor, 89-72.

Ang Inayawan kinsa gipangulohan ni Joseph Guangco sa iyang 30 puntos, milabay sa ilang 10 puntos nga labaw, 59-49 sa may 6:58 ang nahibilin sa third period dihang kalit lang misumbalik ang Ave Maria ug nagpungasi nga 14-2 run aron sakmiton ang liderato, 63-62 ug ang oras nakuhaan ngadto na lang sa 4:04 sa mao gihapong period sa wala pa kini tubaga sa duha ka free throws ni Guangco aron molabaw sila’g usab, 64-63.

Sikit ang kinatibuk-ang fourth period ug ang Inayawan nga inspirado kaayo tungod sa hugyaw sa ilang mga fans, naglabaw og singko puntos, 86-81 may 4:33 ang nahibilin sa duwa apan kalit lang sab kining giilog sa Ave Maria nga giduslitan sa sagunson nga singko puntos gikan ni ex-USJR Jaguar point guard Ariel Estudillo kinsa maoy mihatag sa ilang team ug 88-86 nag-abante. Lain sab niyang triple maoy naghatag kanila’g 91-88 nga labaw ug didto nagsugod pagkulapso ang Inayawan.

Wala na makabangon gikan sa kuyap ang Inayawan bisan pa sa hugyaw nga ilang nadawat gikan sa mga lunod-patay nga fans ug ang Ave Maria nagsaulog didto sa ilang bench.

Si Allen Tarona maoy nangu sa Ave Maria ni team owner Raffy Senining pinaagi sa iyang 23 puntos samtang sila si Jayzar Esperat ug Aldrin Ocanada midugang og 18 ug 17 puntos,matag usa. Laing dako’g natabang mao si Jaymar Canoy kinsang triple sa sayo pa maoy nakahatag og 81-78 nga labaw ug miamot ug 14 puntos.

Si Toroy Huybiar mao lang ang laing player sa Inayawan nga nakahipos og double figures pinaagi sa iyang 14 puntos apan wala mag-igo sila si Robert Abasolo ug ang ubang shooters.

Ang Inayawan barangay officials nga gipangulohan ni konsehal Doods Villareal maoy nang-apud-apod sa mga tropeyo ug ganting cash.

Puntos matag usa:

First Game:

(21 under championship)

HUBS (89)— M. Denora 20, Cabrera 17, Dela Cerna 16, Chiong 13, Ramirez 8, Badana 7, Oca 6, J. Oca 3, J. Denora 2

CHILL (72)— Tallo 20, Jken 15, Carl 13, Canete 11, Delfin 8, Jaca 3, Cabrera 2

Second Game:

(Seniors championship)

Ave Maria SP (102)— Tarona 23, Esperat 18, Ocanada 17, Canoy 14, Jaca 9, Estudillo 8, Buhay 6, Tabolong 3, Lastimoso 2, Ortega 2

Inayawan-Arante (94)— Guangco 30, Huybiar 14, Jueves 9, Abasolo 8, Daculan 8, Baguio 7, Cabo 7, Gabica 6, Cabrera 4, Antipuesto 1 (BANAT)