2010 9-Ball World Pool Championship: Bustamante Kampeon
MANILA, Philippines - Tuluyan nang pinagharian ni Francisco “Django” Bustamante ang 2010 World Pool Championships sa Qatar Billiards and Snooker Federation hall sa Doha, Qatar.
Ito ay matapos igupo ni Bustamante si Taiwanese “The Little Monster” Kuo Po-cheng, 13-7, sa finals para angkinin ang torneong nakahulagpos sa kanya noong 2002.
“Sa wakas nakumpleto na din ang pagiging bilyarista natin. Lahat kasi ito ang pangarap maging WPA World 9-ball champion,” sabi ng Tarlac City native.
Bago nakarating sa finals, binigo muna ni Bustamante ang kababayang si Antonio “Nickoy” Lining, 11-5, sa semifinal round upang maitakda ang kanilang titular showdown ni Kuo, nakatakas kay Johnny Archer ng United States, 11-10.
Naibulsa ni Bustamante ang premyong $36,000 (P1.6 milyon), habang napasakamay naman ni Kuo ang runner-up prize na $18,000.
Tumanggap naman sina Lining at Archer ng tig-$10,000 matapos makapasok sa Final Four. Ito ang pang apat na korona ni Django sa taong ito.
Binanderahan ni Bustamante ang paghahari ng Team Asia sa Team Europe noong Enero 17 sa Brunei na tinawag na “Asia vs Europe Challenge Match” katulong sina Hall of Famer Efren “Bata” Reyes, Hui Chan Lu at Ko Pin-yi ngTaiwan at Teo Che Soon ng Brunei. Tumanggap sila ng tig US$ 5,400.
Noong Marso 21, iginupo naman ni Bustamante si Reyes para sa titulo ng 23rd Annual Japan Open Division sa Tokyo, Japan para sa top prize na US$ 16,000.
- Latest
- Trending
