PhilAm Mountainbike Challenge sa Hulyo 4

CEBU, Philippines - Usa ka dakung cycling event ang gipaabot karong Hulyo 4 sa pagsikad sa PhilAm Mountainbike Extreme Circuit Challenge diha sa Causing Open Field sa Sitio Bayong sa Brgy. Tisa, ning siyudad.

Gipasiugdahan sa Omega Pain Killer Pro, ang lumba gibahin sa 10 ka kategoriya -- elite, seniors, juniors, veterans, masters, beginners, fat boys, golden boys, executive ug womens class.

Mga international cyclists ang mosalmot aron hagiton ang mga top local bets.

Gawas sa mga medalya ug gift certificates gikan sa Oakley eyeglasses, adunay kapin sa P200,000 nga ganting salapi ang giandam alang sa mga mananaog sa matag dibisyon.

Adunay special prize nga ihatag ngadto sa "biggest delegation" ug "best club uniform."

Aduna kini registration fee nga P150 matag entrante libre na ang paniudto, certificate, bike numero ug gift packs.

Ang registration period gikan sa Mayo 15 hangtod Hulyo 2. Mahimong magparehistro sa tanang Bicycle Supplies ug Bicycle Shops dinhi sa Sugbu. Alang sa dugang mga detalye, mahimong motawag sa numero 5831299 ug 4138865. – BANAT NEWS