Reyes, Parica nakabangon sa US Open 10-Ball Championships

MANILA, Philippines - Matapos makalasap ng kabiguan, bumangon sina cue masters Efren “Ba­ta” Reyes at Jose “Amang” Parica sa loser’s brackets para mapanati­ling buhay ang kanilang mga tsansa sa 2010 US Open 10-ball championship sa Riviera Hotel and Casino sa Las Vegas Nevada, USA.

Tinalo ni Reyes si Ame­rican James Baraks, 9-5, habang binigo naman ni Parica ang kababayan nitong si Beau Runningen, 9-7, sa true double elimination, winner’s break format.

Ang torneo ay naglalatag ng kabuuang US$ 89,000 prize purse kung saan ang US$20,000 ay makukuha ng magka­kam­peon at US$12,500, US$8,500 at US$ 5,700 ang matatanggap ng se­cond hanggang fourth-pla­cer, ayon sa pagkakasu­nod.

Natalo kamakalawa si Reyes kay Roberto “Pinoy Superman” Gomez, 6-9, sa second round ng winner’s bracket, samantalang yumukod naman si Parica via default kay Sa­rah Rousey ng USA sa opening round.

Sa third round sa winner's bracket, makakatagpo ni Gomez si Jason Klatt, habang makakaha­rap ni Francisco "Django" Bustamante si Edwin Mon­­tal at makakatapat ni Dennis Orcullo si Stan Tourangeau.

Makakalaban naman ni world 8-ball at 9-ball champion Ronnie "The Volcano" Alcano si Tho­mas Engert; makakaduwelo ni Lee Vann Corteza si Francis Crevier; sasagupain ni Warren Kiamco si Ralf Souquet at makakaengkuwentro ni Al Lape­na si Mike Dechaine.