Gomez pasok sa ko stage sa Nevada Pool

MANILA, Philippines - Nagpakita ng tikas ng paglalaro si Roberto Go­mez upang maibandera ang kampanya ng Pilipinas sa group elimination sa 20­10 Party Poker World Pool Masters na nilalaro sa Riviera Hotel and Casino sa Las Vegas , Nevada.

Si Gomez na tinagu­riang “Superman” at naglalaro para sa Bugsy Promotions ang unang Pinoy na nakapasok sa knockout sta­ge nang makaabante buhat sa winner’s group.

Naglaro sa Group 2, unang kinalos ni Gomez si Earl Strickland ng US , 9-5, bago isinunod si Huidje See ng Netherlands , 9-8.

Hindi naman pinalad na manalo ang iba pang bi­gating cue artist ng bansa tulad nina Efren “Bata” Re­yes, Francisco Bustamante at Ronato Alcano nang ma­patalsik ang mga ito sa tor­neo.

Si Reyes ay yumukod kay Thorsten Hohmann ng Germany, 6-9, at tuluyang namaalam sa isa pang 6-9 kabiguan kay World 9-ball cham­pion Daryl Peach ng Great Britain sa Group 3.        

Sina Bustamante at Alcano ay naglaro naman sa Group 4 at natalo agad sa unang laro kontra kina Do Hoang Quang ng Vietnam (8-9) at Tler Edey ng Canada (4-9) ayon sa pag­kakasunod.

Si Bustamante ay na­ngi­babaw kay Alcano, 9-6, sa losers bracket pero hindi napanatili ang tibay ng pag­lalaro nang bumagsak ito kay Oliver Ortmann ng Germany , 3-9.

Bubuksan naman nina Dennis Orcollo at Lee Van Corteza ang kampanya sa torneong magbibigay ng $20,000 unang gantimpala buhat sa kabuuang $100,000 premyo.

Sa Group 5 lalaro si Or­collo at unang laban kontra kay Shaun Wilkie ng USA habang si Corteza ay magbubukas aksyon kon­tra kay Carlos Cabello ng Spain sa Group 6.