Kapin sa 1,000 modagan sa 3rd Mandaue City Run

CEBU, Philippines - Nakugang ang mga organizers dihang misobra sa usa ka libo ka entrante ang nagpalista sa 3rd Mandaue City Run ugmang adlawa diha sa CICC.

Si Roy Lansang, ang presidente sa Mandaue City Runners Club nagkanayon nga kagahapon nga maoy deadline sa registration mikabat ngadto sa 1,360 ka mga runners ang nagpalista.

Tungod niini, napugos sila pagpahimo og dugang mga race numbers ug singlets aron mahatagan ang tanang partisipante.

Ang lumba gibahin sa upat ka kategoriya -- 21K open ug 10K open alang sa mga top runners dinhi sa Sugbu, 5K (Mandaue inter-barangay) ug 3K kiddie run (13 anyos ug paubos).

Si Simon Losiaboi, kinsa maoy kampiyon sa Great Lapu-Lapu Run 2 maoy usa sa modagan ubos sa 21K.

Lain pang tang-ang runners nga mosalmot sa men's open mao sila si Mendel Lopez, Elmer Bartolo ug John Phillip Dueñas , samtang sa women’s class mao sila si Mary Grace Delos Santos, Madelyn Carter ug Mary Joy Tabal.

Gawas sa mga medalya, ganting salapi ang maangkon sa top performers sa matag dibisyon.

Ang kampiyon sa 21K makadawat og P7,000, ang hari sa 10K makaangkon og P3,000, samtang ang makampiyon sa 5K mobulsa og P2,500.

Ang lumba gipasiugdahan sa Mandaue City Sports Commission ubos sa liderato ni Atty. Hidelito Pascual sa abag sa Mandaue City Runners Club. – BANAT NEWS