'Bat for Z' alang ni Gorres

CEBU, Philippines - Naghugpong ang mga individuals ug corporate entities nga may malumong kasingkasing nga mopasiugda og Z 'The Dream' Gorres Softball Charity Tournament nga ulohan og "Bat for Z" karong Abril 18 diha sa East Visayan Academy sports field sa dakbayan sa Talisay.

Tumong sa usa ka adlaw nga charity tournament nga gipasiugdahan ni Mexican-American Michael Angel Lopez ug Rose Marie Ormo, mao nga makatigom og salapi nga ilang ihatag ngadto ni Gorres alang sa rehabilitation expenses.

Si Gorres gipaubos og brain surgery dihang nawad-an kini og panimuot human sa unanimous decision nga kadaugan batok ni Colombian Luis Melendez niadtong Nobiyembre 13 didto sa House of Blues sa Mandalay Bay Hotel and Casino sa Las Vegas, Nevada.

Ang nahiaguman ni Gorres maoy nakahanaw sa iyang damgo nga mamahimong world champion.

Ang tinubdan sa salapi nga ilang matigom magikan sa registration fee nga P1,500 sa matag koponan.

Mga koponan nga misalmot naglakip sa Halbstarken, Pau D Arco, Rebels, Poblacion Talisay, Langtad, Paknaan, Mandaue Selection, Team Thailand ug Salazar Colleges of Science and Institute of Technology.

Samtang ang little league, magtigi ang koponan gikan sa Punta Princesa, Labangon, Tisa ug Canduman- Mandaue.

Ang torneyo gisuportahan usab sa Cebuana Lhuillier, Pau D Arco, Coca-Cola, M. LhuillIer, East Visayan Academy, Mandaue Sports Commission ug ni Rep. Eduardo 'Eddiegul' Gullas sa unang distrito sa lalawigan sa Sugbu.

Gipahibalo sab sa organizers nga niadtong buot   modunol sa ilang kinasing-kasing nga hinabang alang ni Gorres, mahimong mohatag atol sa ilang pagbisita sa binyu atol sa duwa. – BANAT NEWS