IBC kampiyon sa Inter-Bible School Sportsfest

CEBU, Philippines - Mi-iskor og 88-87 nga kadaugan ang Immanuel Bible College (IBC) sa usa ka kulbahinam nga duwa batok sa Visayan Nazarene Bible College (VNBC) aron masakmit ang titulo sa Inter-Bible School Sportsfest sa Evangelical Theology College of the Philippines (ETCP) didto sa Sitio Banawa, Brgy. Guadalupe, ning siyudad.

Walay gustong magpabiya tali sa duha ka koponan ug nagpuli-puli kini'g kupot sa labaw sulod sa unang-tulo ka kuwarter.

Nakabintaha ang IBC dihang nakuha nila ang dos puntos nga labaw 88-86 sa daginutong oras sa duwa. May purohan pa unta ang VNBC nga dad-on ang duwa sa overtime, apan si Wowee Longcop igo lang mipasud og usa sa duha niya ka free throws sa nahabiling singko segundos.

Ang IBC gipangulohan ni Vasquez sa iyang 16 puntos, gisundan ni Jay Napal nga adunay 15 puntos.

Si Longcop mirehistro og career-high 44 puntos, samtang si Jun Morincillo miposa og 28 puntos, apan dili igo ang ilang paningkamot aron hatagan ang VNBC og daog.

Gawas sa IBC, VNBC ug ETCP, lakip sa koponan nga misalmot sa maong sportsfest mao ang Cebu Wesleyan Bible College (CWBC), Cebu Four Square Bible College (CFBC), Cebu Philippines Bible College (CPBC) ug ang Visayan Alliance School and Theology (VAST).

PUNTOS MATAG USA

IBC (88) - Vasquez 16, Napala 15, Talibong 14, Ebuava 10, Formentor 10, Napala 9, Marquez 8, Almarin 4, Pagobo 4, Jumao-as 3, Labarra 2

VNBC (87) - Longcop 44, Morincillo 28, Tumungha 10, Jetel 4, De Gracia 2, Augustin 2, Jared 2   (BANATNEWS)