Purefoods abante sa Semis

CEBU, Philippines - Mibugha og 28 puntos ang kanhi MVP nga si James Yap aron pangulohan ang Purefoods Tender Juicy Giants sa ilang “do-or-die” game batok sa Rain or Shine Elasto Painters, 95-85, sa quarterfinals sa KFC-PBA Philippine Cup kagabii didto sa Araneta Coliseum.

Sa maong kadaugan, ang Giants mao karon ang moabante sa semifinals round diin ilang sangkaon ang top seeded nga San Miguel Beermen sa ilang “best-of-seven-series”, ang Game-1 gitakda karong Miyerkules.

Naglabaw lang og tres puntos ang Giants sa halftime, 50-47, apan milusad og rally ang Giants nila ni Yap, Kerby Raymundo ug Marc Pingris aron inaton ang labaw ngadto sa 14 puntos, 80-66 sa pagtapos sa third period.

Wala hinuon, musurender ang Painters, ug nakan-an nila ang labaw, 91-85 sa nahibiling tres minutos sa final period, apan mas mipatigbabaw ang tinguha sa Giants nga masakmit ang luna sa semis. Ang duha ka free-throws ni Raymundo sa katapusang minuto maoy misegurado sa daog sa Giants.

Si Solomon Mercado mao ang leading scorer alang sa Painters sa iyang 23 puntos.

Sa laing bahin, natubag sa Talk N’ Text Tropang Texters ang pangutana kung moduwa ba sila sa Game-5. Ang Texters miabot sa binyu, sukwahi sa ilang bahad nga dili sila moduwa batok sa Ginebra Kings agi’g protesta. Ang Texters ug Kings nagduwa pa sa pagsuwat ning balita. - Lemuel P. Maglinte