Tulo ka teams automatic sa Battle of Champions

CEBU, Philippines - Tulo ka teams sa Sugbu ang nakakuha'g otomatik nga luna sa 14th Nestea Fit Beach Volley Champions Cup nga ulohan og "Battle of the Champions" nga gikatakda karong Abril didto sa Boracay Island.

Sila si Ariel Carumba ug Loujie Tipgos sa University of San Jose-Recoletos (USJ-R) ang reigning men's champion ug ang ilang counterparts Erika Camille Verano ug Apple Eve Saraum gikan sa University of Southern Philippines Foundation (USPF) mopakita'g aksiyon aron modepensa sa ilang tagsa-tagsa ka titulo.

Ang USPF men's squad nilang Edward Ybañez ug Jhonrey Opone nakakuha sab og pasaporte ngadto sa national finals human manghawod sa University Games niadtong Oktubre didto sa Iloilo City.

Lahi sa nangaging mga katuigan, walay regional elimination nga ipahigayon ning tuiga diin nakampiyon sa University Athletic Association of the Philippines (UAAP), National Collegiate Athletic Association (NCAA), State, Colleges and Universities Athletic Association (SCUAA) ug ubang regional crown-holders ang makaangkon og katungod alang sa grand finale ning prestihiyosong beach volley event dinhi sa nasud.

Sila si Danika Yolanda Gendrauli ug Lorie May Layno sa Southwestern University (SWU) nga nidaog niadtong 2008 ug uban pang mga koponan sa Sugbu may purohan nga moabante ngadto sa Boracay kun mosalmot kini sa qualifying tournament didto sa Dumaguete. – BANAT NEWS