Kontrata ni Gasol lugwayan sa Lakers

CEBU, Philippines - Makadawat og dugang tulo ka tuig nga lugway sa iyang kontrata ang usa sa pambato sa Los Angeles Lakers nga si Pau Gasol.

Ang kontrata mokabat og 60 milyones dolyares ug magpabilin kaniya isip player sa Lakers hangtod sa 2014.

Si Gasol nga gikan sa Spain, makadawat og labing menos 18.7 ngadto sa 19.7 milyones dolyares sa unang tuig sa iyang contract extension apan nagdepende lang usab kini sa salary cap nga ipatuman sa Lakers.

Ang Lakers adunay record nga 12-1 sukad lang mibalik si Gasol og duwa gikan sa iyang piang ug wala siya makaduwa dayon pagsugod sa 2009-2010 season.

Hayan human ni Gasol, andamon na usab sa Lakers ang kontrata alang kang Kobe Bryant, ang scoring leader sa Lakers.

Si Bryant maoy kanunay nga mangu sa kadaogan sa Lakers sa ilang mga duwa.  - Gabby G. Malagar (BANAT NEWS)