Kapin sa 1K runners managan sa 2nd Talisay Run

CEBU, Philippines - Kapin sa 1,000 runners ang gilaumang moapil sa 2nd Talisay Run 12K Year-End Chase karong Disyembre 27 diha sa Talisay City Hall compound.

Ang kalihukan nga gipasiugdahan sa Talisay Sports Commission ug sa Task Force Alpha pormal nga gilusad atol sa press conference kagahapon diha sa McDonald's-Mambaling.

Mga kategoriya nga tigian mao ang 12K open, 5K open, 5K media , 3K open ug 3K (12 yrs. below).

Malaumon si Kabangis Running Club president Edgar Canton nga malabwan ang numero sa mga partisipante sa miaging tuig.

Gawas sa top runners, giawhag ni Talisay City Councilor Rudy Cabigas ang mga health enthusiasts nga nagtinguhang mopalambo sa ilang kapiskay sa panglawas pinaagi sa ehersisyo.

Lakip sa mga prominenting ngalan nga gidapit mao ang running couple nga sila si Dr. Yong Larrazabal III ug Donna Cruz-Larrazabal, kinsa bag-o lang misalmot sa International Marathon didto sa Macau ug si ABS-CBN TV Patrol news anchor Atty. Haydee Acuña.

Sa iyang bahin, si Felix Villaceran, director sa Task Force Alpha, miasoy nga ang tipik sa salapi nga matigom ilang gamiton alang sa umaabot nilang mga proyekto.

Niadtong interesadong mosalmot,  mahimong magparehistro diha sa Talisay Sports Commission Office ug sa Cebu City Sports Center (CCSC). Aduna kini registration fee nga P150 libre na ang singlet, race packet ug snacks.

Ang deadline sa registration ning maong lumba nga gipaluyohan nilang Serge Osmeña ug Chiz Escudero hangtod sa Disyembre 23. – BANAT NEWS