Yap hari sa open division sa Labogon Open and Kiddies Active Chess tourney

CEBU, Philippines - Gilangkat sa batan-ong Cebuano International Master Kim Steven Yap ang open division title sa Labogon Open and Kiddies Active Chess Tournament niadtong weekend diha sa Labogon Barangay Hall sa dakbayan sa Mandaue.

Ang 21-anyos nga si Yap nagtabla ug ni Joel Pacuribot human sa 23 ka duso sa final sa ilang Sicilian Pelikan game, apan si Yap maoy miangkon sa korona uban ang perpektong rekord nga 6.0 points.

Sila si Francisco Abugho ug Mandaue Open champion Carlos Moreno III nakalingkawas sab sa ilang ikapito ug final matches. Gipukan ni Abugho si Miguel Banibane Jr. human sa 39 ka duso sa London system, samtang si Moreno mipatigbabaw batok ni Erwin Ababat human sa 31 ka duso gamit ang French defense.

Pareho silang mitapos bitbit ang 5.5 points, apan si Abugho maoy miangkon sa ikaduha nga dapit pinaagi sa superior tiebreak output nga 33.0 points pinasikad sa Bucholz system. Si Moreno nakakuha og 30.5 points, gisundan ni Pacuribot nga adunay 27.0 tiebreak points.

Si Yap mibulsa og P2,000 sa maong kadaugan, si Abugho nakaangkon og P1,000, samtang si Moreno nakadawat og P700.

Mikompleto sa top 10 finishers mao sila si Eden Diano ug Nelman Lagutin nga adunay tag 5.0 puntos, Venancio Loyola, Ryan Robillos ug Yves Fiel nga mihipos og 4.5 puntos matag usa ug si Peterson Sia sa iyang 4.0 points.

Sa kiddies category, si Raymond Abellana nagkatabla sa iyang katapusang duwa uban ni Diego Claro human sa 34 ka duso sa English opening ug igo na alang kaniya pagdaog sa titulo sa iyang 6.5 points.

Si Kylle Sevillano, kinsa milupig ni Feliz Shaw Balbona human sa 30 ka duso sa ilang Sicilian match, mitapos sa ikaduha uban ang 6.0 points.

Sila si Daniel Miñoza, Harold Pones ug Balbona nagtabla nga adunay 5.0 puntos, apan si Miñoza, kinsa mitapos sa iyang kampanya pinaagi sa pagpukan ni Ryan Pacres sa 27 ka duso sa Reti opening, mi-okupar sa ikatulo nga dapit kortesiya sa higher tie-breaker nga 31.0 points gamit gihapon ang Bucholz system. Si Pones nalandig sa ikaupat nga dapit, samtang si Balbona napunta sa ikalima.

Gawas sa tropeyo, si Abellana mibulsa sab og P1,000, si Sevillano nakadawat og P700, samtang si Miñoza nakaangkon og P500.

Gipasiugdahan ni NM Leonardo Alidane uban ni international arbiter Marvin Ruelan, kinsa maoy nagdumala sa mga duwa, ang usa ka adlaw nga kompetisyon gipaluyohan sab sa Labogon Barangay Council sa panagsangga sa Rose Pharmacy Inc. ni chess patron Boggie Lim.