100 runners na nagpalista sa Red Cross Run

CEBU, Philippines - Kapin na sa 100 ka runners ang nagpalista sa labing unang Red Cross Humanity Race nga mosikad karong Domingo diha sa atubangan sa PNRC Bldg. sa Osmeña boulevard, ning siyudad.

Ang lumba nga gipasiugdahan sa Red Cross Youth-Cebu ug Philippine National Red Cross (PNRC)-Cebu Chapter adunay upat ka dibisyon -- 10K (Open), 10K (Executive Open), 5K (Open) ug 5K (Red Cross Youth/Volunteer/ Staff).

Matud ni race organizer Alvin Adolfo, nga dul-an na sa 200 ka partisipante, lakip na ang mga top runners sama nilang Robert Carolino, Amale Jopson ang nagparehistro alang sa maong lumba.

Ang Kenyan missionary nga si Simon Losaiboi ug Mary Ann Grace de los Santos nga mihari sa tagsa-tagsa nila ka dibisyon sa 1st Eco-Tourism Fun Run niadtong Domingo, gipaabot sab nga modagan.

Dugang ni Adolfo nga sa milabay'ng mga katuigan daku ang nahimong papel sa ilang Youth Volunteers, kinsa maoy mihatag og tabang ilabi na sa panahon sa mga kalamidad.

Ang matigom nga salapi sa maong lumba malakip sa ilang pundo nga maoy ilang gamiton sa ilang mga proyekto ug outreach programs.

 Sa laing bahin, si race director Joe Deresas, nagkanayon nga gawas sa mga top runners sa Sugbu, modagan usab ang mga tinun-an gikan sa mga nagkadaiyang tunghaan dinhi sa Sugbu. Gidapit sab ni Deresa ang mga runners gikan sa mga silingang lalawigan sa Sugbu aron mosalmot sa maong lumba.

Mga ganting salapi ug tropeyo ang nagpaabot sa mga mananaog. Ang kampiyon mobulsa og P5,000, mopahiluna sa ikaduha makaangkon og P3,000, samtang ang mopatong sa ikatulo makadawat og P2,000.

Ang nag-unang tulo ka mananaog sa 5K Open mobulsa og P3,000, P2,000 ug P1,000 matag usa kanila.

Alang niadtong interesadong mosalmot sa maong lumba, mahimong magparehistro diha sa PNRC Cebu Chapter Bldg. Aduna kini registration fee nga P300 libre na ang singlet ug Red Cross membership, samtang P200 alang sa mga tinun-an ug P150 sa Red Cross Volunteers. – BANAT NEWS