Mga duwa sa PCCL sa Sugbu gikanselar

CEBU, Philippines - Nahanaw ang kahigayonan sa mga Sugbuanon mosaksi sa duha ka kulbahinam nga mga duwa dinhi sa Sugbu karong Nobiyembre 30 dihang ang tigpasiugda sa Philippine Collegiate Champions League (PCCL) mikanselar sa Sweet 16 matches nga naglakip sa host teams.Sayo ning buwana, ang PCCL misaad nga dad-on ang duha ka duwa sa Sweet 16 dinhi sa Sugbu apan kagahapon, si Cebu Schools Athletic Foundation, Inc. (CESAFI) commissioner Felix O. Tiukinhoy, Jr. mipahibalo nga gikanselar ang mga duwa.

Hinuon, ang duwa adto na sa San Juan gym sa Metro Manila karong Nobiyembre 28 diin ang nine-time champion University of the Visayas (UV) Green Lancers moharong sa Mapua Institute of Technology (MIT) Chirping Cardinals, samtang ang second placer University of Cebu (UC) Webmasters makigtakus batok sa University of the East (UE) Red Warriors.

Ang ikatulong team sa Sugbu, ang University of San Carlos (USC) Warriors manulong ngadto sa Ormoc City karong Nobiyembre 30 aron harungon ang reigning NCAA champion San Sebastian College (SSC) Stags ni coach Ato Agustin. – BANAT NEWS