LLBA nakasulod sa finals

CEBU, Philippines - Naangkon sa LLBA cagers ang katapusang luna sa finals human makaipsot sa mga kamot sa Bajao sa kulbahinam nilang duwa, 74-73 sa 2nd Gilbert Purcia Cup basketball tournament niadtong Domingo sa buntag diha sa Guadalupe Sports Complex, ning siyudad.

Sa laing bahin, ang Carga nakasud sab sa finals human midaog pinaagi sa default batok sa Lite Shipping.

Kontrolado sa LLBA ang unang-tulo ka kuwarter sa giya nilang Boboy Ciriaco, Cacay Versoza ug Mario Bancale, apan mitakilid kini sa nanghinapos nga bahin sa fourth period.

Nailog sa Bajao ang labing una ug katapusang labaw, 69-68 human sa basket ni Tiro sa nahabiling 59 segundos sa final period. Dali hinuon nga nabawi sa LLBA ang labaw, 79-69 kortesiya ni Ciriaco gikan sa assist ni Ram Gomez.

Mailog unta og balik sa Bajao ang labaw, apan si Tiro misipyat og usa sa iyang duha ka free throws nga igo lang nakatabla sa iskor, 70-all sa nahabiling 35 segundos.

Si Versoza mituhog og upat ka sunod-sunod nga puntos aron hatagan ang LLBA og kuwatro puntos nga bentaha, 74-70 sa nanghinapos nga bahin sa duwa.

Mihulga ang Bajao pinaagi sa pagsikit human sa 3-point shot ni Darwin Sico, 73-74 sa katapusang 2.6 segundos, apan ulahi na ang tanan kay nahubsan kini sa oras.

Ang LLBA ni coach Billy Nadado ug asst. coach Jerry Augusto, gipangulohan ni Ciriaco pinaagi sa iyang 21 puntos, gisundan ni Versoza nga mipupo og 20 puntos ug Bancale nga miani og 15 puntos.

Si Pompie Ngujo, kinsa maoy topscorer sa LLBA sa miaging duwa, wala kaayo makaarte kay giguwardiyahan kini og maayo ug igo lang naka-iskor og dos puntos uban nilang Ernie Giganto, Rey Amodia ug Neil Pepito. Sila si Gomez ug Arman Lamoste nagkumboya og 11 puntos.

Ang naparot nga Bajao gipangulohan ni Sillar pinaagi sa iyang 20 puntos, gisundan ni Ruiz nga adunay 20 puntos.

Ang tinaktakay nga kampiyonato himuon karong Domingo sa alas-8:30 sa buntag diha gihapon sa Guadalupe Sports Complex.

Ang LLBA gipaluyohan sab sa Rollway Freight Forwarders ni Rolly dela Peza, John Videoke ni Ely Gomoz ug i3R Motor Parts ni Dandan Ramos.

PUNTOS MATAG USA

LLBA (74) - Ciriaco 21, Versoza 20, Bancale 15, Gomez 6, Lamoste 5, Ngujo 2, Giganto 2, Amodia 2, Pepito 2

BAJAO (73) - Sillar 20, Ruiz 19, Ararao 11, Sico 7, Ramos 5, Tiro 5    (BANATNEWS)