3 runners naka-gold sa 14th Milo Little Olympics

CEBU, Philippines - Tulo ka runners sa girls elementary division ang mikabkab sa ikaduha nilang bulawang medalya sa track and field events sa nagpadayong aksiyon sa 14th Milo Little Olympics Visayas elimination niadtong Domingo diha sa Cebu City Sports Center.

Sila si Rosel Ardiente sa Talamban Elementary School, Crizel Diongson sa Umapad ug Vlessica Jagna pulos nanghawod sa 1500m run ug 800m run aron malabni ang duha ka gold medal alang sa tagsa-tagsa nila ka tunghaan.

Sa kasamtangan, ang Cebu Eastern College ug West City Elementary School ang nag-una karon sa standing sa elementary level nga parehong mirehistro og 30 puntos, gisundan sa Grace Christian School sa Tagbilaran nga nakatigom og 22 puntos ug University of Southern Philippines Foundation (USPF) ug sa USC nga nagsawo sa ikatulong dapit sa ilang 20 puntos matag usa.

Sa iyang bahin, ang record holder nga si Loren Dale Echavez milabni usab og upat ka golds sa individual ug usa sa relay swimming event sa secondary level. Si Echavez maoy nag-una sa 200M individual medley event sa oras nga 36.47.

Sa secondary division, ang USC mao karon ang kasamtangang naglawig sa standing sa ilang 77.5 puntos, gisundan sa defending champion University of Cebu (UC) nga mirehistro og 39.25 puntos ug Silliman University nga mikulit og 22 puntos human sa duha ka adlaw nga kompetisiyon.   (Lemuel P. Maglinte)    (BANAT NEWS)