Webmasters mosalida na sab

CEBU, Philippines - Human sa taudtaud nga pahuway, mosalida na sab ang walay pilde nga University of Cebu (UC) Webmasters ug ilang itumong ang ilang canyon ngadto sa University of San Carlos (USC) Warriors kinsa nagtinguha pagpukan sa nahauna atol sa pagpadayon sa 9th season of the Cebu Schools Athletic Foundation, Inc. (CESAFI) didto sa Cebu Coliseum.

Sa engkwentro sa high school, magbuwag sa ilang dalan karong hapon ang defending champion UC Junior Webmasters ug ang runner-up University of the Visayas (UV) Baby Lancers kinsa parehong naghupot og 4-0 nga baraha..

Ang usa sa labing dakung pangutana karon dili mao kung kanus-a maputol ang pagmangtas sa Webmasters batok ngadto sa ilang mga kaatbang apan ang mas angayan tubagon karon mao ang pangutana kung hangtod kanus-a magpadayon ang maanindot nga duwa nga gipakita sa ilang 6-9 nga sentro nga si June Mar Fajardo kinsa daan nang nahibalo nga siya maoy magsagubang dili lang sa depensa gikan sa Warriors kung dili hasta paghakot og puntos alangt sa iyang team nga aduna nay 5-0 nga baraha ug nagkaduol na sa talagsaong elimination round sweep.

Kawang ang presensya ni Fajardo kung dili siya makahugyo karong gabhiona tungod kay nagkaduol sab ang kahigayon nga makab-ot niya ang iyang damgo nga mahimong CESAFI MVP.

Angayan sab hatagan sa Webmasters og pagtagad ang Warriors kalabot sa ilang outside shooting kay dili sab pabentaha ang nauwahi ug taas kaayo ang ilang espiritu tungod sa ilang back-to-back nga daog ning kaulahian.

Ang sangka sa post daan nang hibaw-an nga dominahon sa Webmasters ug angayan lang nilang bantayan nga dili ma-foul trouble si Fajardo apan ang dili hibaw-an kung asa sa duha ka habig ang mag-igo gikan sa gawas ilabi na sa three-point territory. Dili maglayo ang abilidad sa duha ka kampo kung outside shooting ang hisgotan tungod kay ang Webmasters makasalig kang Moncrief Rogado, ang pinakakulba kung mag-igo ug dili siya mahimong CESAFI three-point king sa walay igong hinungdan ug gawas niana, record ang iyang nahimo nga 44 puntos sa maong sangka sa miaging tuig.

Sa laing bahin, makasalig sab ang Warriors kang Giovanni Padillo kinsa bisan og gamay apan abtik ug moklait lang og sulbong bisan pa og naa na dapit sa iyang nawong ang depensa.

Makadugang sa kataas sa moral sa Webmasters mao si Arvin Kim Gomez kinsa hinay-hinay nga nagpaila isip usa ka sinaligan nga shooter ug maayong pagkaliwat sa iyang amahan nga si coach Roel Gomez dihang nagduwa pa sa PBA ang nauwahi. Andam sab og tagana sila si Janssen Abella, rookie Mark Tano, Robinson Mohammad ug Kevin Quilantang.

Pipila sa makadugang og lig-on sa Warriors mao sila si Michael Cantonao, Gene Noel Gallarde, Mark Gil Panerio ug Sam Hermosa. Mas gagmay man tingali ang Warriors apan mas lawom ang ilang bench tungod kay ang Webmasters aduna may labing menos unom ka rookie nga wala kaayo hatagi og igo-igong playing time.

Sa laing bahin, maoy tinguha sa Lancers nga motabla alang sa ikaduhang pwesto uban sa University of San Jose Recoletos (USJR) Jaguars dihang makigsangka sila batok sa Don Bosco Technology (DBTC) Greywolves samtang sa unang duwa, magbagat ang Cebu Institute of Technology (CIT) Wildkittens ug ang DBTC Junior Greywolves uban ang tinguha pagposte sa ilang ikatulong daog ug alang sa ikatulong pwesto. - Gabby G. Malagar (BANAT NEWS)