Basta "First Timer"

CEBU, Philippines - Sa labing unang higayon naka-host ra gyud ang Da-SMAG WRG airsoft team ug matawag nakong malampuson gyud bisan pa man og aduna pa nahabiling usa ka adlaw nga duwa karong adlawa.

Ang Da-SMAG WRG mi-host sa First Mayor Jojo Selma Airsoft Competition diha sa Minglanilla Central Elementary School inabagan sa mga miyembro sa Crack Legion.

Diyutay ra hinuon ang misalmot nga teams gikan sa nagkadaiyang dapit dinhi sa Sugbu, apan bisan pa man nakaingon ko nga natagbaw gyud hinuon ang nanuwa kagahapon.

Nakatawa ko kang Boss Dale Villahermosa human niya angkonang gikulbaan siya ug hapit na niyang di nalang ipadayon ang duwa gumikan sa mga wala damhang mitumaw nga kakulian sa aktuwal nang duwa.

Ang ako lang ikasulti nimo Boss (Dale) ‘ganyan talaga kapag first time.’ Dili normal ang usa ka tawo kun di kulbaan,walay preparasyon nga akong nahibaw-ang misaler o epektibo dayon.

Natural sa tawo nga mo-adjust sa sitwasyon, kun kini preparado. Mao na kini ang tayming nga gamiton ang preparasyong gitagana, susama gihapon sa basics, ang preparasyon i-adjust sa kasamtangang sitwasyon.

Sa una palang nga game aduna nay mga nakitang mga deperensya sa set-up sa field, sa officiating, sa rules ug uban pa. Apan human mapasabot ug nakatilaw sa mechanics sa duwa sa sunod nga games, wala na kaayo'y mga nadungog nga reklamo kun dili mga sugyot sa mga players nga nakatabang sa mga organizers ug napanindot ang dagan sa duwa.

Matud pang Boss Dale si Francis Wilby maoy desidido gyung mahinayon ang duwa, apan basi sa akong mga nadungog sa mga miyembro sa Smag, sila usab gustong mosuway pag-host og susama kakuting torneyo.

Kini usa ka kalampusan sa grupo. Congrats.

* * *

Ako diay i-greet ang atong mga suki diha sa Daanbantayan nga nagsaulog sa ilang kapistahan, ilabi na kang Alfie nga akong fraternity brother, ingon man sa uban pa nga kanunay'ng nagsunod kanato. Wala ako makahigayon sa pagtambong diha sa inyong imbitasyon gumikan usab niining atong trabaho.

* * *

Sa susamang rason, wala usab ako makatambong sa ika-37 ka tuig nga kasumaran sa katukoran sa Yaw-Yan diha sa ilang headquarters sa Sikatuna. Naatol man gud usab kadto nga awarding sa Cebu Archdiocesan Mass Media Awards nga diin ang Banat News maoy nisakmit sa duha ka labing taas nga pasidungog gikan sa award-giving body pinangulohan ni Cebu Archbishop Ricardo Cardinal Vidal.

Hinuon nasayod akong daghan pang umaabot nga katuigan sa Yaw-Yan, dili ba Sir Ekin Caniga? Si Sir Ekin maoy nagdumala ug chief instructor sa Yaw-Yan Ardigma dinhi sa Sugbu nga dugay na usab natong higala.

* * *

Ako sab diay ipaabot ang pahasubo sa atong kaubang si Elly Bolonos tungod sa pagtaliwan sa iyang inahan sa milabay'ng semana.

Si Bolonos, nagsulat dinhi sa Banat News ug usa sa nakadawat sa 2009 CAMMA Awards isip Best in News Stories.

* * *

Susama gihapong pahasubo ngadto sa akong kauban sa airsoft nga si Jojo Penaso ug mga kabanay sa pagtaliwan usab sa amahan niini niadtong Agosto 25.

* * *

Sa milabay'ng semana misaad akong mohisgot sa arnis o eskrima nga giplanohan unta natong saw-an dinhi sa akong lindog, apan gumikan sa uban pang mga kakulian wala nato ikaatubang ang tawong makatabang nato unta og pasabot kabahin sa ilang art.

* * *

(Alang sa mga sugyot, komentaryo ug pahibalo, g i-email lang sa [email protected]) (BANAT NEWS)