Liksi at kumbinasyon ang pamatay ni Viloria

MANILA, Philippines - Liksi at kumbinasyon.

Ito ang dalawang sandatang nakikita ni Brian “The Hawaiian Punch” Viloria na kanyang magagamit laban kay Mexican challenger Jesus “Azul” Iribe para sa kanyang unang title defense ngayon sa Blaisell Center sa Honolulu, Hawaii.

Sa kanilang weigh in kahapon, sinabi ni Viloria, idedepensa ang kanyang naagaw na International Boxing Federation (IBF) light flyweight crown sa unang pagkakataon, na alam na niya kung ano ang kanyang gagawin kay Iribe.

“He likes to jab, he has a good jab, but he doesn’t like to go inside,” ani Viloria kay Iribe. “I have to put my combinations together and use my speed to my advantage.”

Muntik nang magmulta si Iribe nang tumimbang nang sobra sa 108 pound limit sa kanyang unang pagtuntong sa weighing scale.

“Viloria is a very strong fighter and I have to be very cautious with what I’m doing,” wika ni Iribe, lalaban sa labas ng Mexico sa kauna-unahang pagkakataon, kay Viloria na naging miyembro ng U.S. Team sa 2000 Olympic Games. “I’m a technician; I like to put combinations together. I’ve been an underdog before. This is not the first time. I don’t prepare any different if I’m underdog or not.”

Ibinabandera ni Viloria, tinalo si Mexican Ulises “Archie” Solis via 11^th-round TKO noong Abril 19 sa Araneta Coliseum, ang 25-2-0 win-loss-draw ring record kasama ang 15 KOs, samantalang dala naman ni Iribe ang 15-5-0 (9 KOs) card.

Ito ang unang title fight na gagawin sa Hawaii matapos ang 33 taon kung saan nauwi sa draw ang banggaan nina Filipino Ben Villaflor at Samuel Serrano para sa World Boxing Association (WBA) super featherweight crown.

Dalawa namang Filipino fighters ang nasa undercard ng Viloria-Iribe championship fight.

Sasagupain ni bantamweight AJ Banal si Jose Angel Beranza ng Mexico sa isang 10-round bout, samantalang haharapin naman ni light welterweight Dennis Laurente si Mexican Zaid Zavaleta sa isa ring 10-rounder.  (Russell Cadayona)