Alberto's Pizza miharos sa elimination round

CEBU, Philippines – Giharos sa Alberto's Pizza ang walo ka duwa sa eliminasyon human gipilde ang Cebu Doctor's University (CDU) Reapers, 79-71 sa double overtime sa 5th Lucky Tableware Regulars Basketball Tournament diha sa Visayan Glass gym sa barangay Guadalupe, ning siyudad.

Bitbit ang 8-0 nga baraha ning torneyo nga gipaluyohan sa Bianca Marketing, ang Alberto's Pizza nakabaton og "twice-to-beat" advantage batok sa fourth-ranked Visayan Ballers sa crossover nga giduwa kagabii diha gihapon sa Visayan Glass gym. Laing luna sa finals ilogan sa Phat Thursday Resto Bar (4-4) ug i828 (3-5).

Sayong nakaangkon og pabor ang CDU Reapers dihang miarangkada kini pagsugod sa duwa diin ilang gidominar ang unang tulo ka kuwarter. Hinuon, ang Alberto's Pizza luyo sa paningkamot nilang Martin Grogaard, Kent Tandan ug Heide Prete, mibawos ug nakahimo pa sa pagtabla, 56-all nga mihatod sa duwa ngadto sa overtime.

Ang Alberto's Pizza nakatilaw og labaw, 68-67 human sa free throws ni Grogaard sa nahabiling 11 segundos sa unang overtime.

Sa sunod nga ball possession, si Maiko Datan gi-foul nga mao unta mobaswat sa CDU Reapers ngadto sa kadaugan, apan usa lang sa duha niya ka free throws ang napasud hinungdan nga nagtabla ang iskor, 68-all ug misangko sa ikaduhang overtime.

Sa second overtime, ang mga batos sa Alberto's Pizza mipakita sa ilang determinasyon pinaagi sa paglusad og 11-3 rally nga nakapabugnaw sa kainit sa CDU Reapers.

Sila si M. Grogaard, Tandan ug Prete nagkumboya og 69 puntos aron pangulohan ang Alberto's Pizza. Si Grogaard mihaon og 29 puntos, si Tandan misansan og 21 ug si Prete migaling og 19 puntos.

Ang nakaging nga CDU Reapers gipangulohan ni Martin sa iyang 18 puntos, gisundan ni Datan nga adunay 15 puntos.

Puntos Matag Usa

Alberto’s Pizza (79) - M. Grogaard 29, Tandan 21, Prete 19, H. Grogaard 9, Chua 3

CDU Reapers (72) - Martin 18, Datan 15, Coromoinas 14, Keith 9, Gabuya 8, DJ 7 – BANAT NEWS