SPORTSgab usa ka tuig na

CEBU, Philippines - Ugmang adlawa Mayo 19, takdo nga usa na ka tuig ang SPORTSgab. Sulod sa usa ka tuig ning atong senemanang lindog nga mogawas lang matag adlaw'ng Lunes, kaduha lang kini mosipyat sa pagpatik dinhi sa Banat Sports tungod sa mga kakulian nga dili gyud kalikayan ug ingon man usab sa communication gap.

Ug sulod sab sa usa ka tuig, usa lang ka higayon nga akong napamatud-an nga aduna gyu’y mobasa sa SPORTSgab tungod sa reaksiyon nga gipadangat dinhi sa usa ka sports organizer nga nagpailang si Mike Roma nga napatik dinhi sa Banat sports Abril 18. Inay masuko ako kang Roma, nalipay ako kay nibasa diay siya sa akong lindog.

Dili na unta ako angay pa nga mohisgot niini kay kinsa man usab kini si Roma nga hatagan og luna dinhi sa Banat nga mismo sa iyang kaugalingon wala man gani siya makaila kaniya. Mao ning tawhana ang gitawag og dual identity o dual citizenship kay sa usa ka dokumento, iyang gipirmahan Tournament Commissioner/Event Organizer ug dihang medyo bulilyaso gamay, nanghunaw kini morag si Poncio Pilato ug mipirma og laing dokumento nga Deputy Commissioner. Asa man gyud ka ani ug kinsa man gyud diay ka Roma? Are you from Rome? Dili na sab ko motuo nimo kung sunod nimong pirmahan janitor na ang imong ranggo kay sobra na kaayo ka-cheap. Pag-tsur ha.

Apan ang ako lang dili gyud masabtan aning Roma kay hangtod karon wala pa gyud niya ipanghimakak ang akong mga pasangil kalabot sa iyang pagka-palpak. Ang iya ra gyung gipugnit kadto rang pipila ka pulong nga wala niya mauyoni ug wala sab gyu’y unod ang iyang tubag. Mas may undanon pa gud ang alimango sa Bohol.

Iya akong gipasanginlan nga bias kuno ngadto sa usa ka amigo ug sukad nakong puyo dinhi sa kalibotan, wala pa ako makadungog og tawo nga bias sa iyang kontra.Ambot ug diin nga planeta kini mahimugso si Roma nga moluwat man og pulong nga dili gamiton ang utok. Tsk, tsk,tsk. Hahay kanimo Roma, pahuway na tawon. Ayaw og paloma og dala’g lega kung di nimo kaya.

Nasayod ko nga wala ka magpuyo sa La Paloma ug dili sab Kukurukuku Paloma ang imong theme song, busa ayaw og paloma-loma.

* * *

Game 7 karon sa East ug West

Magtiwas na karong buntag ang Boston Celtics batok sa Orlando Magic alang sa East semifinals ug ang Los Angeles Lakers batok sa Houston Rockets alang sa West semis.

Ang best-of-seven series nagtabla karon sa 3-3 apan ang nakaparat lang kay ang Boston ug Lakers maoy mo-host sa Game 7 busa may daku sila’g kahigayonan hinuon dili kini maoy garantiya.
Sa akong pangagpas, ang Boston ug ang LA moay modaug didto sa ilang tagsa-tagsa ka korte ug akong nabantayan nga mura’g gituyo kini’g paabot og Game 7 aron modaku ang kita sa Celtics ug Lakers ilabi na karon kay nag-anam na kagamay ang motan-aw sa NBA tungod sa global financial crisis.

Kung nakahimo pagpilde ang Lakers sa Rockets ug 40 puntos sa usa ka duwa sa serye, 118-78, dili imposible nga ila kining usban og pilde bisan tuod og dili na kaabot og 40 puntos.
Susama sab sa Boston nga gustong adto magsaulog sa kadaugan sa ilang korte kay mas tam-is ug halandumon man kung atubangan sa ilang fans magsaulog kay wala pay mo-boo.
Gani sa miaging adlaw, ang Miami Heat nanaktak og mga empleyado kay mihinay ang kita sa American Airlines. Bisan dinhi sa Pilipinas, walay ballclub nga dili gusto makakwarta.

SG Miscellaneous. Belated Happy Mother’s Day and belated birthday greetings to Congressman Francisco “Lalo” Matugas of the 1st District of Surigao del Norte last May 10. He is considered the Father of Siargao International Game Fishing. Belated birthday greetings too to my son Matt Erikson C. Malagar last May 14. We had our 16th wedding anniversary last May 16. - BANAT NEWS