High Speed Hitters magpapalakas sa semis

MANILA, Philippines — Palalakasin ng PLDT ang tsansa sa semifinals sa pagsagupa sa sibak nang Galeries Tower sa 2026 Premier Volleyball League (PVL) All-Filipino Conference Siklab Series.

Lalabanan ng High Speed Hitters ang Highrisers ngayong ala-1 ng hapon, habang sa alas-6 ng gabi magpapang-abot ang Farm Fresh Foxies at Capital1 Solar Spikers sa Philsports Arena sa Pasig City.

Solo ng semifinalist Nxled ang liderato hawak ang 5-0 record kasunod ang Creamline (4-2), Farm Fresh (4-2), Choco Mucho (4-3), PLDT (3-3), Akari (3-4), Capital1 Solar Energy (2-4), ZUS Coffee (1-5) at Galeries Tower (1-5).

Parehong nagmula sa pagkatalo ang High Speed Hitters at Highrisers sa kanilang mga huling laban.

Yumukod ang PLDT sa Farm Fresh na tumapos sa kanilang three-game winning streak sa pagbabalik ni coach Rald Ricafort, habang natalo ang Gale­ries Tower sa talsik na ring ZUS Coffee.

Sa tournament format, ang top four teams matapos ang single round-robin elimination ang sasampa sa semifinals kung saan ang top two squads ang magkakaroon ng ‘twice-to-beat’ bonus kontra sa No. 3 at No. 4 seeds.

Ang championship round ay isang best-of-three series.

Muling aasahan ng High Speed Hitters sina Fil-Canadian Savi Davison, Kim Kianna Dy, Majoy Baron, Mika Reyes, Alleiah Malaluan, Dell Palomata, setter Kim Fajardo at libero Kath Arado.

Ipaparada ng Highri­sers sina Erika Deloria, Jean Asis, Lycha Ebon, Alyssa Bertolano, Roselle Baliton, rookie setter Lams Lamina at libero Dolly Verzosa.