Korona tinguha sa Hotel Fortuna

CEBU, Philippines - Gawas lang og duna pay laing mahimong babag, ang pagsakmit sa korona sa CESAFI Partner's Cup maoy bugtong tumong sa Hotel Fortuna/SWU Cobras karong gabhiona dihang ila na sab atubangon ang Enervon/UC Webmasters sa Game 4 sa ilang best-of-five championship series didto sa Cebu Coliseum.Ang duwa karon gikatakda sa alas 6 sa hapon.

Sa ilang 2-l nga abante, ang Cobras nagpanikad na aron pagsaulog sa labing una nilang korona sa Partner's Cup ug kini mahitabo lang kung dili na makasugakod ang Webmasters. Sa pagka karon, gawas sa Webmasters, mahimong sila ra usab ang mabasol kung ilang hatagan ug laing kinabuhi ang Webmasters.                

Sa laing bahin, nagtinguha sab karon ang Webmasters sa pagtabla sa serye aron inaton kini ngadto sa Game 5 ug seguradong naghimo na sila'g mga kausaban sa game plan human sila masagunsoni sa Cobras sa Games 2 ug 3.

Tinguha karon sa Webmasters nga makahuygo pag-ayo sa opensa sila si Moncrief Rogado, Edward Pao ug Kelvin Juliane kay gumikan sa opensa nilang tulo, daku kaayo sila'g kahigayonan nga makatabla.

Kung ang ilang 6'9 nga sentro nga si June Mar Fajardo lang ang saligan sa opensa sa Webmasters, wala gyud sila'y porsiyentong madag-an kay gawas pa nga foul prone si Fajardo, madehado sila og kapoyon na unya si Fajardo.

Karong gabhiona diin krusyal kaayo ang duwa, kinahanglan nang mo-iskor sila si Rogado, Pao ug Juliane ug kung magdungan og buto silang Rogado ug Janssen Abella, mahimong magpista sa ilawom si Fajardo kay wala ma'y makapiog niya sa poste gawas lang sa pag-foul kaniya.

Ang Cobras kinsa na-unhan sa Webmasters sa Game 1 (89-99), daling nakabawos ug maoy midaug sa Games 2 ug 3 lakip ang 107-98 nga daug sa overtime sa Game 2 aron tablahon ang serye.

Nakuha nila ang 2-1 nga bentaha human sa ilang 93-83 nga kadaugan sa Game 3.          

Ang Cobras moduwa nga wala gihapon si Clifford Maguate ug kadudahan sab nga makaduwa karong gabii ang ilang abtik nga offguard nga si Eleazar Armecin kinsa nahagsa sa Game 3 dihang nakig-ilogay siya sa ball possession batok kang Kevin Quilantang sa UC.

Hinuon, ang Cobras adunay daghang hinagiban nga magamit nga naglakip kanilang Alfred Belande, Chris Litorja, Aard Diango, Eliud Poligrates ug Eric Zanoria.Andam sab tagana sila si Rene Pacquiao, Ritchie Jalandoni, Gilbert Gallarde ug Richard Gianchan.

Ang puntos ni Fajardo alang sa UC nahibaw-an nang daan tungod kay sila maoy pambato apan ang dakung pangutana kung makatabang ba si Rogado o dili?

Si Rogado ra'y makatubag niini karong gabii.   (BANAT NEWS)