David Lim nidominar sa C.A.R.S. Autocross Showdown

Cebu - Unom ka titulo ug duha ka runner-up ang nahakot sa Sugbuanong si David Lim atol sa first leg sa Autocross Regional Championship Series nga tipik sa Cebu Auto and Racing Show (CARS) niadtong Domingo didto sa Park Mall sa Mandaue Reclamation area.

Si Lim sa DGL Motosports Racing Team nidominar sa modified B ug C, novice modified B ug sa Open B ug C class. Iya sab nga nakuha ang overall fastest time nga 56.52 segundos.

Mihagdaw sab si Lim og duha ka second place finish pinaagi sa novice, modified C nga nadaog ni Justin Neri ug ang all-wheel drive class nga gidominar ni Randy Paray.

Napun-an ang kalipay ni Lim dihang ang iyang anak nga si David Lim Jr. midaog sa all-sports car title.

Laing Lim nga si Philip, mipakita sab sa iyang abilidad aron paghari sa novice stock A ug B uban ni Blake Go naghari sa modified novice A.

Si Neri, gawas sa iyang pagdominar sa novice C action, iya sab nga gisakmit ang all-euro class championship.

Si Louie Blanco maoy mikompleto sa mga mananaog pinaagi sa paghari sa showbiz class sa oras nga 1.02.77.

Sa sound-off competition, si Jason Yap mikulit og double victory pinaagi sa unlimited three-way category ug sa three-way eight-woofer contest.

Si Ryan Yu maoy labing sipa sa two-way category sa car show, samtang ang yellow Honda Jazz ni Erwin Go maoy nidaog sa best in show title ug iya sab nakuha ang best in engine ug best dressed trophies.

Si Joel Sandal nidaog sa three-way two-woofer system, si Dyan Dy sa two-way woofer, si John Moro sa two-way four-woofer ug si Michael Albano sa three-way four woofer.

Sa car show, ang yellow 1970 Ford Mustang maoy best American car, best interior ug best class car. Ang Mazda RX-8 maoy best Japanese car award, ang Toyota FJ Cruiser maoy best SUV award, samtang ang classic Volkswagen Beetle nga gipanag-iya ni Byron Piramide maoy nidaog isip best European car ug best paints awards. – BANAT NEWS