Atangi ang CBA

CEBU - Ang akong higala nga si Romy Cal, kanhi coach sa Cebu Institute of Technology (CIT) Wildkittens ug karon team consultant sa Carmen Copper Corporation (CCC) nga tua manukad sa Lutopan, Toledo City, mibutyag dinhi kanako nga adunay bag-ong grupo sa basketbol nga pagapormahon ang konsehal sa dakbayan sa Sugbu nga si coach Raul 'Yayoy' Alcoseba.

Ang nahunahunaan nga ngalan sa grupo mao ang CBA. Dili kini Collective Bargaining Agreement nga kanunay natong madungog kun adunay rally sa mga mamumuo kun dili ang buot ipasabot niini mao ang Cebu Basketball Association.

Matud pa, ang CBA maoy tubag sa mga dili iladong mga teams nga makapakita sa ilang abilidad ilabi na kay wala nay commmercial league dinhi sa Sugbu human molayat ang MLKP-Cebu Niños ni Michel Lhuillier ug ni coach Alcoseba ngadto sa Liga Pilipinas diin aduna kini national scope.

Ang mga teams nga kanhi sakop sa Mindanao Visayas Basketball Association (MVBA) diin sakop ang Niños, nabungkag tungod sa pagkahimugso sa Liga Pilipinas nga gisalmotan usab sa mga teams gikan sa Luzon.

Ang CCC gi-agni ni Alcoseba sa pagsalmot isip regular member sa CBA.

Maayo kaayo kini nga kalamboan dinhi sa Sugbu kay kun adunay daghang liga, adunay trabaho ang mga players ilabi na kadtong magsige lang og “panalay”.

Ang dakung pangutana nga nagtangag og dakung ganti mao nga unsa kagubot ug kanus-a mahimong malampuson kining CBA. Sa kasaysayan sa basketbol sa Sugbu, ang Cebu Amateur Basketball Association (CABA) nga nahimong CBL sa kadugayan, maoy labing una ug labing dugay nga liga apan nabungkag lang usab sa kadugayan.

Kun mahinumduman, misuway pag-atake dinhi sa Sugbu ang Metropolitan Basketball Association (MBA) diin naila og maayo ang Cebu Gems apan sulod sa tulo ka tuig, kalit lang napawong mura’g lamparilya nga nahubsan og gas. Kun unsa kakusog ang ilang pagsulpot , kusog pa sa “falling star” ang ilang pagsukarap.

Diha kadtoy Mandaue Industrial Commmercial Athletic Association (MICAA), Cebu Basketball Federation (CBF) National Basketball League (NBL), United Regional Basketball League (URBL) ug National Basketball Conferecne (NBA). Asa na man kining mga ligaha karon? Pulos wala magdugay.

Mosaler kaha kining CBA? Ang PBA ug PBL ra gyud ang nailang kusgan nga liga sa basketbol sa Pilipinas. Ang PBA alang sa professioanls ug ang PBL alang sa amateur.

* * *

Nadani ang akong pagtagad sa usa ka sinuwat sa internet nga aduna kunoy upat ka bag-ong pulong nga madugang sa atong dictionary sa sunod tuig.

Matud pa sa Publisher sa Collins dictionary, ang mga pulong o “words” nga meh, jargonaut, frenemy ug huggles.

Ang “meh” gigamit isip usa ka expression kung ang tawo gibati na’g kalaay o kapuol sa usa ka panghitabo. Ang example nga gigamit sa tagsulat mao kini “The Canadian election was so meh. Mahimo sab ni ingnon nga “the game between USC Warriors against Xavier University was so meh the Warriros were leading by a mile. Ang jargonaut gigamit alang sa mahiligon sa “jargon” o kanang mga pinulongan nga gi-isip nga “unintelligible” language, frenemy alang sa usa ka kaaway nga nagpakaaron ingnon nga higala ug huggles isip kombinasyon sa hugs (gakos) ug snuggles (hagwa o gitik). – BANAT NEWS