Guardo milubong sa McMill Enterprises sa BAR 1st Conference

CEBU – Walay puangod nga gilubong sa Atan Guardo ang kaatbang nga McMill Enterprises aron pagkulit og 86-69 nga kadaugan sa 2008 Basketball Association of Ramos (BAR) First Conference didto sa Cogon-Ramos Sports Complex.

Ang Atan Guardo kanunay naggukod, apan nakaginhawa kini sa himalatyong oras sa maong duwa aron pagpukan sa McMill.

Gibiyaan og otso puntos human sa first quarter, ang Atan Guardo hinay-hinay nga mikamang hangtod nga miabot na lang og dos puntos ang labaw sa McMill sa halftime, 42-44. Sa pagpanglimbasog sa Atan Guardo nakatabla kini sa iskor, 58-all paghuman sa ikatulong kuwarter.

Sa final chapter, ang Atan milusad og 28-11 run aron paglansang og 17 puntos nga kadaugan.

Lima ka mga magduduwa ang miligwat og double figures alang sa balanseng opensiba sa Atan Guardo.

Si Bebot Dysam mikabkab og 20 puntos, ang team manager ug Sambag I Brgy. Captain Jerry L. Guardo ug si Reynolds Zamora mihakot og 16 puntos matag usa, samtang sila si Roy Sabay ug Benjie Tudtud nagkumboya og 21 puntos.

Ang Atan Guardo gipaluyohan sa Uniherb Philippines, ang tiggama sa nabantog nga popular food supplements sama sa Arthro, Heartvit, Diabet ug Kidneycare.

PUNTOS MATAG USA

Atan Guardo (86) -- Dysam 20, Guardo 16, Zamora 16, Sabay 11, Tudtud 10, De la Cruz 7, Rama 4, Endap 2

McMill (69) -- Pader 18, Scuya 16, Miano 13, Membrano 12, Cuyos 4, Rojas 2, Cabarrubias 2, Japitan 2 – BANAT NEWS