De la Hoya naghinam-hinam nga mu-away

Naghinam-hinam na si Golden Boy Oscar de la Hoya nga mahibaw-an kung kinsa gyud ang iyang makasangka atol sa katapusan duwa sa iyang kinabuhi una pa kini moretiro sa pagpamoksing.

“I want to have it done by next week, absolutely,” matud ni de la Hoya.

Kahinumdoman nga wala magkasinabot ang kampo ni de la Hoya ug Manny Pacquiao niadtong miaging semana dihang nagtagbo kini alang sa away niini nga gikatakda unta karong Disyembre 6 nga ipahigayon didto sa MGM Grand, Las Vegas.

Nisugot na unta si Pacquiao nga makig-away ni de la Hoya sa welterweight (147 pounds) division apan miatras kini dihang ang gi-offer ni de la Hoya 70-30 nga pagbahin sa kita sa away.

Matud pa ni promoter Bob Arum sa Top Rank Boxing nga si Pacquiao gusto nga 60-40 ang binahinay sa duwa imbes 70-30 nga mao ang gitanyag ni de la Hoya.

Samtang ang chief executive sa Dela Hoya’s Golden Boy Promotions nga si Richard Schaefer mibutyag nga wala niya ma-estorya ang kampo ni Pacquiao apan iyang nadunggan nga interesadong makigsabot pagbalik ang Pinoy boxing superstar.

“He sort of realized that 30% of the big pie is better than 100% of the small pie,” dugang ni Schaefer.

Gipabuhagay usab ni Arum nga nagkasulti na sila ni Pacquiao kagahapon sa buntag apan ang WBC lightweight champion nagdumili pa gihapon sa pagdawat sa 70-30 nga binahinay apan naglaum gihapon si Arum nga magkasabot ra kini sa dili madugay.

“ There’s still the possibility of meeting somewhere in the middle,” matud ni Arum.

Ang 35 anyos nga si de la Hoya katapusang mi-away niadtong Marso sa 150 pounds ug miluba ni Arturo Gatti sa 147 pounds niadtong Marso 2001 samtang ang 29 anyos nga si Pacquiao misaka ngadto sa 135-pound division niadtong Hunyo ug midagit sa lightweight title batok ni David Diaz pinaagi sa ninth-round knockout didto sa Mandalay Bay Events center sa Las Vegas.

“I’m already down to 149-150 pounds. I’m just waiting patiently,” dugang ni de la Hoya.