MMA showdown sa Yaw-Yan headquarters

Mabahaan karon sa katawhan ang Yaw-Yan Cebu ArDigma Headquarter atol sa ipahigayong Yaw-Yan Fighting Challenge I nga giulohan og “Tribute to Grandmaster Nap” Kickboxing and Mixed Martial Arts Fights.

Ang kumbati sugdan sa alas-7:00 sa gabii sa maong headquarters nga nahimutang  sa 304 sa Villacampa-Capuras building duol sa UC-main campus.

Pito ka dagkung away   ang gikatakda aron paglingaw sa tumatan-aw diin si Danilo ‘Alasan’ Tudtud sa Yaw-Yan ArDigma Cebu City makiglayog ni Mark ‘The Guardo’ Baluntang sa CMAM Kickboxing Club sa Mandaue nga maoy  main event. 

 Sa main attraction sa MMA showdown si David ‘Dynamite’ Denisi sa Gracie Barra Cebu makigsambunot ni Junrey ‘The Hitman’ Soquite sa Durex Kickboxing Club sa Lapu-Lapu City.

Sa laing bugno sa MMA, si Alvin ‘The Heat’ Amistoso sa Mixed Fighting System sa Lapu-Lapu City moharong ni Jonjer ‘The Danger’ Cabahug sa Durex Kickboxing Club.

Sa special kickboxing duel, si Rednan ‘Limbas’ Noblefranca sa Yaw-Yan ArDigma makigsangka ni Lito ‘Fearless’ Malabago sa CMAC Kickboxing Club sa Mandaue.

Mokompleto sa kickboxing matches mao si Jeff ‘Labuyo’ Malicay sa Yaw-Yan ArDigma Cebu City batok ni Joel ‘Tawi’ Caparida sa Team Black Scorpion Kickboxing Club sa  Talisay City, Geronimo ‘D’ Dare Devil’ Etac sa Yaw-Yan Temple batok Adam ‘The Assasin’ Torbiso sa Durex Kickboxing Club ug Bonbon ‘Matador’ Llera sa Yaw-Yan ArDigma Cebu City batok ni Armel ‘Ahwo’ Arcipe sa Team ATC Kickboxing Club sa Mandaue.

Ang mga tiket nagkantidad og P150 pinaagi sa first-come, first-served basis.