Lancers gipalagpot sa  Cyber Knights

Gipakuratan sa Asian College of Technology (ACT) Cyber Knights ang gamhanang University of the Visayas (UV) Green Lancers human kini midaog og uno punto, 88-87  sa nagpadayong aksiyon sa 1st Lionel Bacaltos Mayor's Cup basketball tournament sa miaging gabii didto sa Sibonga.

Alang kang Cyber Knights coach Tata Merced mao kadto ang labing krusyal ug maanindot nilang kadaugan kay gawas pa nga mao kadto ang nagpalagpot sa Lancers, nakuha sab nila ang unang luna sa finals sa ilang 4-1 nga baraha.

Biya pa ang Cyber Knights og usa ka punto, 86-87, apan sila maoy adunay ball possession sa katapusang 27 segundos ug si Dondon Nuñez sa Cyber Knights nakakubit og foul gikan ni Chris Victor Diputado sa UV Lancers didto sa undergoal. Si Nuñez kalma kaayong mipasulod sa duha niya ka free throws sa katapusang kuwatro segundos   nga maoy mipadaog kanila samtang wala na makahimo’g tirada ang Lancers sa daginutong segundos.

Si Nuñez kinsa mi-iskor og 11 puntos sa fourth quarter aron pangulohan ang ilang rally, maoy nangu sa Cyber Knights sa iyang 22 puntos.

Sa sayo pa, dali kaayong napapas sa Cyber Knights ang ilang lima ka puntos nga biya ug nabiyaan na lang sila og uno  punto sa katapusang 27 segundos.

Sila si JC Ver Paraguya ug Joel Vistal daku sab og natampo sa opensa sa Cyber Knights sa ilang 15 ug 14 puntos.

Si Gregory Slaughter mihipos og 21 puntos alang sa Lancers kinsa miduwa didto sa Sibonga sa miaging adlaw nga wala ang duha ka sinaligan nga sila si Ritchum Dennison ug Phil Mercader. Si Junjun Lasala mi-iskor og 14 puntos, samtang ang rookie nga si Harold Cincoflores miamot og 12 puntos.

Sila si Diputado ug Harlow Chad Villanil pulos mitampo og 11 puntos alang sa Lancers.

Samtang natagak na ang Lancers, ang University of San Jose-Recoletos (USJ-R) Jaguars ug ang Southwestern University (SWU) Cobras kinsa parehong nagbitbit og 3-1 nga baraha, maoy mag-ilog sa katapusang luna sa finals ug ang mapilde maoy makigsangka sa UV  Lancers alang sa ikatulong puwesto.

Puntos kada usa

ACT (88) -- Nuñez 22, Paraguya 15, Vistal 14, Aparice 11, Pontemayor 8, Batiancila 7, Doy 7, Suico 4

UV (87) -- Slaughter 21, Lasala 14, Cincoflores 12, Diputado 11, Villanil 11, Lao 8, Sendrijas 6, Tagalog 2, Silva 2.