Zebron Red mipaluhod sa San Antonio

Mikulit na sab og daog ang Zebron Red pinaagi sa pagpukan sa San Antonio, 86-75 sa nagkainit nga aksiyon sa 2008 Sambag 1 Summer  League niadtong miaging gabii didto sa Sambag 1 Sports Complex.

Milabaw ang Zebron Red og sayes puntos sa first quarter, 24-18 ug sa grabeng pagpamuntos sa ilang sinaligan nga si Mando Pineda mitubo ang labaw ngadto sa 11 puntos paghuman sa first half sa iskor nga 46-35.

Misuway og gukod ang San Antonio pinaagi sa paningkamot nilang Roy Melgo ug Edoy Fernandez sa ikatulong kuwarter, apan wala kini molampos sa ilang tinguha gumikan kay wala nila matarog ang 11 puntos nga labaw sa Zebron Red paghuman sa third quarter, 66-55.

Sa maong kadaugan, ang Zebron Red nagtangag na og 5-1 win-loss record,  samtang ang ilang biktima nagbitbit og 3-2 nga baraha ning maong torneyo nga temporaryo karong gidominar sa Atan Guardo nga adunay 6-1 nga baraha.

Ang summer league gipasiugdahan sa Sambag I Barangay Council  ubos sa liderato ni  Brgy. Capt. Jerry Guardo uban sa pag-abag ni Atan Guardo sa Uniherb Philippines, ang tiggama sa Arthro Kontra Arthritis, Kidneycare, Heartvit ug Diabet.

Puntos Matag Usa

Zebron Red (86) – Pineda 25, Renstone 20, Narf 15, Valle 10, Mancao 10, Tallo 6

San Antonio (75) -  Melgo 26, Fernandez 22, Jack 15, Andoy 8, Ramirez 4