Gisugdan na GAA Founders' Cup basketball tournament

Napulo'g unom  (16)  ka teams ang  misalmot sa 9th Guadalupe Athletic Association (GAA) Founders’ Cup basketball tournament nga misikad niadtong Domingo didto sa Guadalupe Sports Complex.

Ang Cebu Movers System, Inc. usa sa mga entrante nga gipanag-iya ni Dr. Boy Te, ang bag-ong napiling presidente sa GAA. Ang ilang muse nga si Ivy Reyes maoy midaog sa "Miss GAA 2008" title.
 Ang mga partisipanteng koponan gibahin ngadto sa duha ka brackets.

Naglangkob sa  bracket  A mao ang Pears, Agencia Grande, G&S International, McMill Enterprises, 2171 Platoon, Swan, AC Sports ug Team Melo. Samtang ang mga koponan nga nagpundok sa bracket B mao ang Pan Burikat, MGR, Tigers, Aqua Serv, Ram Boys, Evan-Aulga, Signsport Advertising ug ang Cebu Movers System, Inc.

Ang mga duwa himuon matag adlaw'ng Domingo gikan sa alas-8:00 sa buntag hangtod sa alas-9:00 sa gabii.

Si Rico S. Navarro, ang sports columnist sa The Freeman, ang igsuong mantalaan sa Banat News maoy pinasidunggang dinapit ug mamumulong.